8 տարում առաջին պարտությունը կրած եւ հիվանդանոց տեղափոխված Ջորջիո Պետրոսյանի վիճակը կայուն է

23:57   16 հոկտեմբերի, 2021

Քիկբոքսինգի K-1-ի լեգենդար մարտիկ, Իտալիայում բնակվող Ջորջիո (Գևորգ) Պետրոսյանը Սինգապուրում անցկացված ONE Championship-ի հերթական մրցաշարում սենսացիոն պարտություն է կրել Թաիլանդի ներկայացուցիչ Սուպերբոն Բանչամեկի հետ մենամարտում։ Կիսաթեթեւ քաշային կարգում աշխարհի ժամանակավոր չեմպիոնի տիտղոսի համար մենամարտի երկրորդ ռաունդում Պետրոսյանը ոտքով հարված է ստացել ծնոտին եւ հայտնվել խորը նոկաուտում։ Մենամարտից հետո Ջորջիո Պետրոսյանը հոսպիտալացվել է։

Իտալիայում One FC-ի նախագահ Կառլո Դի Բլազին հայտնել է, որ Ջորջիո Պետրոսյանի վիճակը կայունացել է։

«Ամեն ինչ կարգին է, նա գիտակցության է եկել։ Պետրոսյանը զայրացած է։ Սպորտը կարող է պարգեւել մեծ ուրախություն եւ մեծ հիասթափություն։ Ջորջիոն երկար տարիներ մեզ ուրախություն է պարգեւել իր հաղթանակներով, հիմա ժամանակն է, որ մենք լինենք նրա հետ։ Նա դարձյալ ոտքի կկանգի եւ կվերադառնա ավելի ուժեղ»,- Դի Բլազիի խոսքը մեջբերում է gazetta.it-ը։

Սա Ջորջիո Պետրոսյանի առաջին պարտությունն է 8 տարում։ Նա ևս մեկ մենամարտ կանցկացնի դեկտեմբերի 4-ին Միլանում՝ մրցելով ռուսաստանցի Սայֆուլահ Խամբախադովի հետ: Այդ մենամարտում նա կփորձի պաշտպանել Iska-ի չեմպիոնական գոտին:

Սինգապուրում Հայաստանը ներկայացնող Մարատ Գրիգորյանը կիսաթեթեւ քաշային կարգում ժամանակից շուտ հաղթել է Թաիլանդի ներկայացուցիչ Սիտիչայա Սիտսոնպեենոնգին։



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։