Աշխարհի չեմպիոն Մալխաս Ամոյանին բազմաթիվ երկրպագուներ դիմավորեցին «Զվարթնոցում» (ֆոտո, վիդեո)

08:43   12 հոկտեմբերի, 2021

Նախորդ գիշեր Երեւանի «Զվարթնոց» օդանավակայանում մեծ շուքով դիմավորեցին աշխարհի նորընծա չեմպիոն Մալխաս Ամոյանին: 22-ամյա Մալխաս Ամոյանը աշխարհի առաջնությունից վերադարձավ հորեղբոր՝ Պեկին-2008 Օլիմպիական խաղերի բրոնզե մեդալակիր, աշխարհի փոխչեմպիոն, Եվրոպայի կրկնակի չեմպիոն Ռոման Ամոյանի, հունահռոմեական ըմբշամարտի Հայաստանի հավաքականի գլխավոր մարզիչ Էդուարդ Սահակյանի եւ մարզիչ Սամվել Գեւորգյանի ուղեկցությամբ:

Նրանք Օսլոյից Երեւան ժամանեցին Օսլո-Վարշավա-Երեւան չվերթով հոկտեմբերի 12-ին 03:40-ին: 22-ամյա աշխարհի չեմպիոնին «Զվարթնոց» օդանավակայանում դիմավորեցին զուռնա-դհոլով: Ժամանման սրահում սպասում էին մեծ թվով երկրպագուներ, եզդիական համայնքի ներկայացուցիչներ, հարազատներ, բարեկամներ: Սպորտային ղեկավարությունից աշխարհի չեմպիոնին դիմավորեց ԿԳՄՍ փոխնախարար Կարեն Գիլոյանը, նախարարության ներկայացուցիչներ, ՀԱՕԿ գլխավոր քարտուղար Հրաչյա Ռոստոմյանը, , Հայաստանի ըմբշամարտի ֆեդերացիայի նախագահ Ռոբերտ Խաչատրյանը, գլխավոր քարտուղար Արայիկ Բաղդադյանը, հավաքականի մարզիչ Գեւորգ Ալեքսանյանը: Մալխաս Ամոյանին դիմավորելու էր եկել նաեւ Օսլոյում ազատ ոճի ըմբշամարտի աշխարհի առաջնության բրոնզե մեդալ նվաճած Արսեն Հարությունյանը:

Կորոնավիրուսով պայմանավորված սահմանափակումներից ելնելով հարազատների ու երկրպագուների մեծ մասը չեմպիոնին սպասում էին դրսում: Ամենամեծ երկրպագուն Մալխաս Ամոյանի կրտսեր եղբայրն էր՝ 7-ամյա Դավիթը, որն անհամբեր սպասում էր եղբոր ժամանմանն ու աշխարհի առաջնության ոսկե մեդալին:

Աշխարհի չեմպիոն եղբորը դիմավորելուց հետո, փոքր Դավիթը ոսկե մեդալն «իրենով արեց» եւ որոշեց այլեւս չվերադարձնել: Դրսում հավաքվածները երկար ժամանակ բաց չէին թողնում աշխարհի չեմպիոնին. բոլորը ցանկանում էին անձամբ շնորհավորել եւ լուսանկարվել չեմպիոնի հետ:

Մարդկանց բազմությունը խաթարել էր օդանավակայանի երթեւեկելի հատվածի բնականոն աշխատանքը: Առաջացել էր խցանում, ինչին ստիպված միջամտեց տեղում ծառայություն իրականացնող ճանապարհային ոստիկանությունը:

2021 թվականի հունահռոմեական ըմբշամարտի աշխարհի առաջնությունում 8 ըմբիշով մասնակցած Հայաստանի թիմը պայքարն ավարտեց մեկ ոսկե մեդալով: Հոկտեմբերի 8-ին Հայաստանի միակ ոսկե մեդալը նվաճեց Եվրոպայի փոխչեմպիոն, Եվրոպայի Մ23 չեմպիոն Մալխաս Ամոյանը (72 կգ):

Լուսինե Շահբազյան

Ֆոտո՝ Արսեն Սարգսյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։