Ալեքսանդր Գրիգորյան. Գիտենք, թե ինչ կազմով ու ինչպես է խաղալու «Գլազգո Ռեյնջերսը» (ֆոտո)

Հայաստանի չեմպիոն «Ալաշկերտի» գլխավոր մարզիչ Ալեքսանդր Գրիգորյանը նախախաղային ասուլիսում խոսել է շոտլանդական «Գլազգո Ռեյնջերսի» դեմ Եվրոպայի լիգայի որակավորման փլեյ-օֆֆ փուլի պատասխան հանդիպման մասին:

«Վաղվա խաղում հաջողության հասնելու համար առաջին հերթին պետք է ճիշտ խաղանք, ընտրենք ճիշտ տակտիկա ու խաղացողների համար անհատական առաջադրանքներ: Իհարկե, մեզ նաև հարկավոր է նվիրվածություն՝ ավելի շատ, քան նախորդ բոլոր խաղերում:

Գուցե «Գլազգո Ռեյնջերսը» կադրային կորուստներով է ժամանելու Հայաստան, սակայն նրանց կազմում կա ընտրության մեծ հնարավորություն: Բացի այդ, թիմի առաջատարները կարող են խաղալ: Մենք գիտենք, թե ինչ կազմով դաշտ դուրս կգա մրցակիցը և ինչպես է խաղալու, այդ պատճառով ամեն բան կախված է նրանից, թե ինչպես մենք կօգտագործենք մեր իմացածը»,- նշել է մարզիչը:

«Ալաշկերտի» ու «Գլազգո Ռեյնջերսի» միջև հանդիպմանը տեղի կունենա օգոստոսի 26-ին Վազգեն Սարգսյանի անվան «Հանրապետական» ստադիոնում և կսկսվի ժամը 19:00-ին: Առաջին խաղում Շոտլանդիայի չեմպիոնը հաղթել է նվազագույն հաշվով:

Ավելի վաղ հայտնի էր դարձել, որ «Գլազգո Ռեյնջերսում» սկսվել է կորոնավիրուսի բռնկում, ինչի պատճառով թիմի գլխավոր մարզիչ Սթիվեն Ջերարդը և 6 ֆուտբոլիստներ չեն մեկնել «Ալաշկերտի» դեմ խաղին:

Հիշեցնենք, որ նախորդ փուլում «Ալաշկերտը» 2 խաղերի արդյունքում ուժեղ էր գտնվել (0:0, 3:2) ղազախական «Կայրաթից» և դուրս եկել Եվրոպայի լիգայի որակավորման վերջին փուլ՝ ապահովելով առնվազն ՈւԵՖԱ-ի նորաստեղծ մրցաշար Կոնֆերենցիաների լիգայի խմբային փուլի ուղեգիր:

Եվրագավաթներում «Ալաշկերտը» պայքարը սկսել է Չեմպիոնների լիգայի որակավորման առաջին փուլից, որտեղ 2 խաղերի արդյունքում հաղթել է Ուելսի չեմպիոն «Կոնաս Կի Նոմադսին» (2:2, 1:0), իսկ երկրորդ փուլում պարտվել է մոլդովական «Շերիֆին» (0:1, 1:3) և պայքարը շարունակում է Եվրոպայի լիգայում:

Ֆոտո՝ Էմմա Ասատրյան