Արթուր Դավթյան. Օլիմպիական խաղերում 3-րդ տեղը մեր պայմանների համար ոսկի է (ֆոտո)
12:22 5 օգոստոսի, 2021Օլիմպիական մեդալը մեզ համար արդեն հասանելի է: Ուրախ եմ, որ մեր անմխիթար պայմաններում մարզվելով՝ կարողացանք պատմական մեդալ ունենալ:
Այս մասին լրագրողների հետ զրույցում «Զվարթնոց» օդանավակայում ասաց Տոկիո-2020-ի սպորտային մարմնամարզության հենացատկի մրցաշարում բրոնզե մեդալ նվաճած, Եվրոպայի չեմպիոն, Եվրոպական խաղերի հաղթող Արթուր Դավթյանը, որն այս գիշեր ծանրամարտի կրկնակի օլիմպիական փոխչեմպիոն Սիմոն Մարտիրոսյանի հետ վերադարձել է հայրենիք, փոխանցում է NEWS.am Sport-ի թղթակիցը:
Արթուր Դավթյանը Տոկիո-2020-ում պատմական նվաճում գրանցեց՝ 41 տարվա դադարից հետո անկախ Հայաստանին բերելով առաջին մեդալը Օլիմպիական խաղերի սպորտային մարմնամարզության մրցաշարում:
«Կարծում եմ՝ մարմնամարզությունում բրոնզե մեդալը ոչ միայն ինձ համար է հաղթանակ, այլեւ՝ բոլորիս: Օլիմպիական խաղերում երրորդ տեղը մեր պայմանների համար ոսկի է: Լավ գիտեք՝ հայկական մարմնամարզությունում դահլիճային պայմաններն ինչ վիճակ է: Սառույցը կոտրվեց: Օլիմպիական մեդալն այլեւս մեզ համար հասանելի է: Մեզանից հետո եկող երիտասարդ սերդի համար ճանապարհը բացվեց: Նրանք կիմանան, որ օլիմպիական մեդալը հասանելի է: Կրկնվեմ, մեր վատ պայմաններում այս մեդալը շատ մեծ արդյունք է:
Սպասում էի, որ մեդալ եմ նվաճելու: Իրականում, սպասելիքներս ավելի բարձր էին, կարող էի նվաճել ոսկե մեդալ: Մի փոքր լավ չստացվեց երկրորդ ցատկս: Ուրիշ ոչինչ ինձ չէր խանգարում: Լավ պատրաստ էի, լավագույն մարզավիճակում էի, հոգեբանորեն տրամադրված էի: Միայն եզրափակիչում մի փոքր չստացվեց: Այս մեդալը, հաջողությունը Աստծո կողմից տրված էր: Անբացատրելի զգացողություն է, որ 4 տասնամյակ մեդալ չունենալուց հետո, ես եմ նվաճում առաջին օլիմպիական մեդալը մեր անկախ պետությունում: Սա մեր թիմի, մեր մարզիչների քրտնաջան աշխատանքի, բոլորիս բարձր նվաճումն է, ինչով հպարտանում եմ»,- ասաց Արթուր Դավթյանը:
Հիշեցնենք, որ Հայաստանի առաջատար մարմնամարզիկը Ճապոնիայի մայրաքաղաք Տոկիոյում ընթացող 32-րդ ամառային Օլիմպիական խաղերի հենացատկի վարժությունում օգոստոսի 2-ին բրոնզե մեդալակիր դարձավ 14.733 միավորով՝ զիջելով միայն oլիմպիական չեմպիոն դարձած կորեացի Շին Ջի Հվանին (14.783 միավոր) եւ երկրորդ տեղը գրաված ռուս Դենիս Աբլյազինին (14.783 միավոր): Նախորդ անգամ Հայաստանը սպորտային մարմնամարզությունում օլիմպիական մեդալ նվաճել էր 1980 թվականին Մոսկվայում տեղի ունեցած 22-րդ ամառային Օլիմպիական խաղերում, որտեղ ԽՍՀՄ-ի հավաքականի կազմում թիմային բազմամարտի օլիմպիական չեմպիոնի տիտղոսը նվաճել էր Ալբերտ Ազարյանի որդին՝ Էդուարդ Ազարյանը:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.