Տոկիո-2020. Լեւոն Աղասյանն ավարտեց պայքարը

06:58   3 օգոստոսի, 2021

Հայաստանի առաջատար եռացատկորդ Լեւոն Աղասյանն ավարտեց պայքարը Տոկիո-2020-ում: 32-րդ ամառային Օլիմպիական խաղերի աթլետիկայի մրցաշարում Հայաստանի միակ ներկայացուցիչ Լեւոն Աղասյանը չկարողացավ հաղթահարել եռացատկի նախնական փուլի արգելքը:

Կապանցի եռացատկորդը հանդես եկավ B խմբում եւ գրանցեց 16,42 մետր արդյունք: Այս խմբում Աղասյանը 16 մասնակիցների մեջ 11-րդ տեղը զբաղեցրեց:

B խմբում եզրափակիչ դուրս եկավ 3 եռացատկորդ՝ պորրտուգալացի Պեդրո Ռիկարդոն (17,71 մետր), թուրք Էր Նեկատին (17, 13 մետր) եւ Ալժիրի ներկայացուցիչ Տրիկի Յասեր Մոհամեդը (17,05 մետր):

Նշենք, որ Օլիմպիական խաղերի եզրափակիչի նորմատիվը 17,05 մետր արդյունքն էր: Լեւոն Աղասյանը չբարելավեց նաեւ իր լավագույն արդյունքը, որը 17,16 մետր էր: Այս արդյունքը Աղասյանը գրանցել էր 2021 թվականի մայիսի 29-30-ը Թբիլիսիում տեղի ունեցած Վրաստանի բաց առաջնությունում, որտեղ էլ նվաճել էր Տոկիո-2020-ի Օլիմպիական խաղերի ուղեգիր։

Տոկիո-2020-ում 12-րդ մրցումային օրվա առավոտյան մրցահերթում Հայաստանի օլիմպիական հավաքականից հունահռոմեական ըմբշամարտի 1/8 եզրափակիչում պայքարի մեջ կմտնի Կարեն Ասլանյանը (67 կգ): 26-ամյա ըմբիշը կմրցի 2016թ. աշխարհի ու 2017թ. Եվրոպայի չեմպիոն, 34-ամյա հունգարացի Բալինտ Կորպաշիի հետ:

Ավելի ուշ բռնցքամարտի մրցաշարում պայքարի մեջ կմտնի Հայաստանի վերջին ներկայացուցիչ Հովհաննես Բաչկովը: 63 կգ քաշային կարգի քառորդ եզրափակիչում Եվրոպայի կրկնակի չեմպիոնը կմենամարտի Ուզբեկստանի ներկայացուցիչ, 2017թ․ Ասիայի չեմպիոն, 2015թ․ աշխարհի առաջնության բրոնզե մեդալակիր, ԱՄՆ-ում բնակվող Էլնուր Աբդուրաիմովի հետ, որը 1/8 եզրափակիչում 5։0 հաշվով հաղթել է տաջիկ Բախոդուր Ուսմոնովին։



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.