Արթուր Դավթյանը՝ Տոկիոյից. Հպարտ եմ, որ այս մեդալը գալիս է Հայաստան
16:23 2 օգոստոսի, 2021Հպարտ եմ, որ այս մեդալը գալիս է Հայաստան։ Անչափ ուրախ եմ։ Շատ կուզեի, որ ոսկի լիներ, բայց բրոնզե մեդալն ինձ համար ոսկու արժեք ունի։
Այս մասին NEWS.am Sport–ի թղթակցի հետ զրույցում Տոկիոյից ասաց 32-րդ ամառային Օլիմպիական խաղերում բրոնզե մեդալ նվաճած սպորտային մարմնամարզիկ Արթուր Դավթյանը։
«Շատ ուրախ եմ եւ հպարտ, որ այս մեդալը, օլիմպիական մեդալը գալիս է Հայաստան։ Երջանիկ եմ, որ կարողացա մեդալ նվաճել։ Շատ կուզեի, որ ոսկի լիներ, բայց բրոնզ եղավ։ Ամեն դեպքում, անչափ ուրախ եմ։ Այս պահին դեռ չգիտեմ ինչ զգացողություններ ունեմ, միայն հպարտ եմ», - ասաց Արթուր Դավթյանը։
28–ամյա մարզիկը նվաճեց անկախ Հայաստանի պատմության առաջին մեդալը Օլիմպիական խաղերի սպորտային մարմնամարզության մրցաշարում:
Հայաստանի առաջատար մարմնամարզիկը բրոնզե մեդալակիր դարձավ Ճապոնիայի մայրաքաղաք Տոկիոյում ընթացող 32-րդ ամառային Օլիմպիական խաղերի հենացատկի վարժությունում: Եզրափակիչում Եվրոպայի չեմպիոն, Եվրոպական խաղերի հաղթող Արթուր Դավթյանը երկու ցատկերի հանրագումարում վաստակեց 14.733 միավոր:
41 տարի անց Հայաստանն օլիմպիական մեդալ նվաճեց սպորտային մարմնամարզությունում։
Պարգեւատրվելուց հետո Արթուր Դավթյանը առաջինը տեսազանգով կապ հաստատեց կնոջ՝ Անահիտ Շեգունցի հետ, որը Ալբերտ Ազարյանի անվան մարզադպրոցում 2-ամյա դստեր Ալիսայի, Դավթյանի ընկերների, հավաքականի անդամների հետ ուղիղ հեռարձակմամբ հետեւում էր ամուսնու ելույթին Տոկիո-2020–ում։
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.