Տոկիո-2020. Արմեն Մելիքյանը մեկնարկեց հաղթանակով
06:44 1 օգոստոսի, 2021Ճապոնիայի մայրաքաղաք Տոկիոյում շարունակվող 32-րդ ամառային Օլիմպիական խաղերի ըմբշամարտի մրցաշարում Հայաստանի հավաքականի առաջին ներկայացուցիչ Արմեն Մելիքյանը (60 կգ) մեկնարկեց հաղթանակով:
Հունահռոմեականների մրցաշարի 60 կգ քաշային կարգում 2019թ. մինչեւ 23 տարեկանների աշխարհի չեմպիոն Արմեն Մելիքյանը 1/8 եզրափակիչում մրցեց 2019թ․ աշխարհի առաջնության բրոնզե մեդալակիր, 22-ամյա իրանցի Ալի Ռեզա Նեջաթիի հետ և հասավ ծանր հաղթանակի (5:5):
Առաջին մրցափուլից հետո իրանցի ըմբիշը հաշվի մեջ առջևում էր 2:0 հաշվով, սակայն երկրորդում 25-ամյա Մելիքյանը վաստակեց 5 միավոր: Վերջնամասում Նեջաթին հավասարեցրեց հաշիվը, բայց հաղթանակի հասավ հայ ըմբիշը:
Արմեն Մելիքյանի գոտեմարտի ժամանակ Առաջին ալիքը ցուցադրում էր Տոկիո-2020-ի կանանց ըմբշամարտի գոտեմարտ:
Քառորդ եզրափակիչում Արմեն Մելիքյանը կմրցի 2018թ. աշխարհի բրոնզե մեդալակիր, 2019 և 2020 թթ. Եվրոպայի բրոնզե մեդալակիր, 31-ամյա ուկրաինացի Լենուր Տիմուրովի հետ, որը մեկնարկային գոտեմարտում 5:0 հաշվով վստահ հաղթանակ տարավ ուզբեկ Էլմուրատ Տասմուրադովի նկատմամբ:
Հիշեցնենք, որ Տոկիո-2020-ի հունահռոմեական ոճի ըմբշամարտի մրցաշարում Հայաստանը կներկայացնեն նաև Կարեն Ասլանյանը (67 կգ), Կարապետ Չալյանը (77 կգ) և գործող օլիմպիական չեմպիոն Արթուր Ալեքսանյանը (97 կգ): Չալյանն ու Ալեքսանյանը պայքարի մեջ կմտնեն օգոստոսի 2-ին, իսկ Ասլանյանը՝ օգոստոսի 3-ին:
Ազատ ոճի ըմբշամարտի մրցաշարում Հայաստանը կունենա 2 մասնակից՝ Արսեն Հարությունյանը (57 կգ) և Վազգեն Թևանյանը (65 կգ):
Արմեն Մելիքյան, հունահռոմեական ոճի ըմբշամարտ, 60 կգ քաշային կարգ
Ծնվել է 1996 թվականի փետրվարի 7-ին Էջմիածնում։
Անձնական մարզիչներն են Ամիրբեկ Պողոսյանը, Ալիկ Հովհաննիսյանը եւ Արմեն Մելիքյանը։
2013 թվականի պատանիների Եվրոպայի չեմպիոն է, 2015, 2016 թվականների երիտասարդների Հայաստանի մրցանակակիր:
2017 թվականի սկզբին հեռացել է մեծ սպորտից եւ միառժամանակ մեկնել արտագնա աշխատանքի: 2017 թվականի ավարտին վերադարձել է Հայաստան, մասնակցել Հայաստանի մեծահասակների առաջնութանն ու դարձել չեմպիոն 60 կգ քաշային կարգում:
2018 թվականից մեծահասակների Հայաստանի հավաքականի անդամ է: 2019 թվականին Հունգարիայիայում տեղի ունեցած մինչեւ 23 տարեկանների աշխարհի առաջնությունում նվաճել է չեմպիոնի տիտղոսը:
2021 թվականի մայիսի 8-9-ը Բուլղարիայի մայրաքաղաք Սոֆիայում անցկացված վարկանիշային մրցաշարում դարձել է չեմպիոն՝ նվաճելով նաեւ Տոկիոյի Օլիմպիական խաղերի ուղեգիր 60 կգ քաշային կարգում:
Ամուսնացած է, ունի որդի:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.