Նովակ Ջոկովիչ․ Առանց ճնշման չի լինում պրոֆեսիոնալ սպորտ, բայց ես մշակել եմ մեխանիզմներ

Աշխարհի առաջին ռակետ Նովակ Ջոկովիչը խոսել է Տոկիոյի Օլիմպիական խաղերում հոգեբանական ճնշման եւ դրա հաղթահարման մասին։

34-ամյա սերբ թենիսիստն այս մրցաշրջանում նվաճել է «Մեծ սաղավարտի» մրցաշարերի երեք տիտղոս եւ մոտ է «Ոսկե սաղավարտին» (Ավստրալիայի, Ֆրանսիայի, ԱՄՆ-ի բաց առաջնությունների, Ուիմբլդոնի մրցաշարի հաղթողի կոչումներն ու օլիմպիական տիտղոսը մեկ մրցաշրջանում)։

«Ճնշումը արտոնություն է, որն ունենում են առաջատարները։ Առանց ճնշման չի լինում պրոֆեսիոնալ սպորտ։ Եթե նպատակդ առաջինը լինելն է, պետք է կարողանալ կորտում եւ դրանից դուրս հաղթահարել ճնշումը։

Չեմ կարող ասել, որ չեմ նկատում այս աղմուկը, բայց ես մշակել եմ մեխանիզմներ, որոնք օգնում են ինձ հաղթահարել հոգեբանական ճնշումը եւ չշեղվել գլխավոր նպատակին հասնելուց։

Ճնշումը ինձ չի հյուծում։ Ես արդեն բավականաչափ փորձառու եմ, որպեսզի դա չնկատեմ եւ կորտում ցուցադրեմ լավագույն խաղս»,- Ջոկովիչի խոսքը մեջբերում է Itftennis-ը։

Տոկիոյում Ջոկովիչը հասել է քառորդ եզրափակիչ եւ այժմ մրցում է ճապոնացի Կեյ Նիսիկորիի հետ։