Եվրո-2020․ Անգլիան լրացուցիչ ժամանակում հաղթեց Դանիային եւ առաջին անգամ դուրս եկավ եզրափակիչ (ֆոտո, վիդեո)

01:36   8 հուլիսի, 2021

Եվրո-2020-ի կիսաեզրափակիչում Անգլիայի հավաքականը լրացուցիչ ժամանակում 2։1 հաշվով առավելության հասավ Դանիայի թիմի նկատմամբ եւ առաջին անգամ դուրս եկավ Եվրոպայի առաջնությունների եզրափակիչ։ Լոնդոնի «Ուեմբլի» ստադիոնում տեղի ունեցած դիմակայության հիմնական ժամանակում գրանցվեց ոչ ոքի՝ 1։1։

Առաջինը հաջողության հասան դանիացիները։ 30-րդ րոպեին տուգանայինից կատարած հարվածով գեղեցիկ գոլի հեղինակ դարձավ իտալական «Սամպդորիայի» 21-ամյա կիսապաշտպան Միկել Դամսգորը։

39-րդ րոպեին Անգլիան վերականգնեց հավասարությունը։ «Մանչեսթեր Սիթիի» հարձակվող Ռահիմ Ստերլինգի հարվածը կանխելիս սեփական դարպասը գրավեց դանիացիների պաշտպան, իտալական «Միլանի» 32-ամյա խաղացող Սիմոն Կյաերը։

Լրացուցիչ ժամանակի առաջին խաղակեսում 11 մետրանոց վաստակեց Ռահիմ Ստերլինգը եւ անգլիացիներին առաջ մղեց Լոնդոնի «Տոտենհեմի» 27-ամյա հարձակվող Հարի Քեյնը, որի հարվածը «Լեսթեր Սիթիի» 34-ամյա դարպասապահ Պետեր Շմեյխելը հետ մղեց, բայց Քեյնը առաջինը հասավ գնդակին եւ գրավեց դարպասը։

Հուլիսի 11-ին «Ուեմբլիում» անցկացվելիք եզրափակիչում Գարեթ Սաութգեյթի գլխավորած թիմը կմրցի Իտալիայի հավաքականի հետ, որը կիսաեզրափակիչում հետխաղյա 11 մետրանոցներով հաղթել էր իսպանացիներին:

Եվրո-2020, կիսաեզրափակիչ

Անգլիա - Դանիա՝ 2։1 (հիմնական ժամանակ՝ 1։1), (տեսանյութ), (Լոնդոն)

Սիմոն Կյաեր, 39, ինքնագոլ, Հարի Քեյն, 104 - Միկել Դամսգոր, 30

Չիրացրած 11մ՝ Հարի Քեյն, 104



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։