Սաութգեյթ. Էրիկսենի կորուստը մեծ հարված էր Դանիայի համար, սակայն նրանք հրաշալի կերպով դուրս եկան այդ վիճակից
16:47 7 հուլիսի, 2021Անգլիայի հավաքականի գլխավոր մարզիչ Գարեթ Սաութգեյթը խոսել է դանիացիների դեմ Եվրո-2020-ի կիսաեզրափակիչի հանդիպման մասին:
«Իհարկե, խաղացողների անհատական վարպետությունն ունի կարևոր դերակատարում, սակայն մենք կիսաեզրափակիչ ենք հասել թիմային ոգու շնորհիվ: Այժմ նոր մարտահրավեր է սպասում մեզ: Աշնանը 2 անգամ խաղացել ենք Դանիայի հավաքականի դեմ, և ես գիտեմ այդ թիմի ուժեղ կողմերը: Նրանք ունեն շատ լավ թիմ: Կրիստիան Էրիկսենի հետ կապված միջադեպից հետո նրանք խաղում են հույզերի ֆոնին, և դա հասկանալի է: Իհարկե, Էրիկսենի կորուստը մեծ հարված էր Դանիայի հավաքականի համար, սակայն նրանք հրաշալի կերպով դուրս եկան այդ վիճակից: Կարծում եմ՝ նրանք որսացել են հուզական ալիքը, իսկ երկրպագուների հետ կապը դարձել է ավելի ամուր. դա շատ է օգնում թիմին:
Մենք կդառնանք ֆանտաստիկ հանդիպման մի մասնիկը: Այս անցած ճանապարհից հետո դարձել ենք ավելի փորձառու: Ստիպված էինք մեծ ջանքեր գործադրել այստեղ հասնելու համար: Մենք երբեք չենք խաղացել Եվրոպայի առաջնության եզրափակիչում: Սա պատմության մեջ մտնելու ևս մեկ հնարավորություն է: Շատերը կարծում են, որ մենք չունենք մեծ մրցաշարերում հաջող հանդես գալու պատմություն: Սա շատ հուզական պահ է մեր թիմի համար, և բոլոր խաղացողները գիտակցում են դա»,- մարզիչի խոսքը մեջբերում է Sky Sports-ը:
Անգլիա – Դանիա հանդիպումը տեղի կունենա հուլիսի 7-ին Լոնդոնի «Ուեմբլի» ստադիոնում և կսկսվի Երևանի ժամանակով 23:00-ին: Գլխավոր մրցավարն է հոլանդացի Դանի Մակելին:
Այս զույգի հաղթողին եզրափակիչում սպասում է Իտալիայի հավաքականը, որը կիսաեզրափակիչում հետխաղյա 11 մետրանոցներով հաղթել էր իսպանացիներին:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.