AS. Շատ առումներով Եվրո-2020-ը Մորատայի մրցաշարն էր
17:15 7 հուլիսի, 2021Իսպանական AS-ն արձագանքել է Իսպանիայի հավաքականի հարձակվող Ալվարո Մորատայի խաղին Եվրո-2020-ի կիսաեզրափակիչում: Իտալիայի հավաքականի դեմ խաղում Թուրինի «Յուվենտուսի» ֆուտբոլիստը փոխարինման էր դուրս եկել 62-րդ րոպեին, իսկ 18 րոպե անց հավասարացրել հանդիպման հաշիվը: Հետխաղյա 11 մետրանոց հարվածաշարի ժամանակ Մորատան չէր կարողացել գրավել դարպասը:
«Մորատան երբեք չի մոռանա այս խաղը: Ժորժինյոյի 11 մետրանոցից հետո նրա արածն ամեն բան բացատրում է: Շատ առումներով սա Մորատայի մրցաշարն էր: Հարձակվողն ունեցավ գրեթե բոլոր զգացողությունները՝ երկրի հերոսից մինչև հակահերոս»,- գրում է AS-ը:
Եվրո-2020-ում Ալվարո Մորատան մասնակցեց 6 խաղի և դարձավ 3 գոլի հեղինակ:
Լոնդոնի «Ուեմբլի» ստադիոնում կայացած խաղում իտալացիները հաղթել էին հետխաղյա 11 մետրանոցներով և դուրս եկել եզրափակիչ: Հանդիպման հիմնական ու լրացուցիչ ժամանակն ավարտվել էր 1:1 հաշվով:
Իտալիայի հավաքականի՝ 2018 թվականից սկսված անպարտելի շարքը հասավ 33 հանդիպման: Այդ ցուցանիշով ռեկորդակիր են Բրազիլիայի ու Իսպանիայի հավաքականները, որոնք չեն պարտվել 35 խաղ անընդմեջ: Բրազիլացիները ռեկորդային շարքը գրանցել են 1993-1996թթ., իսկ իսպանացիները՝ 2007-2009թթ.:
Հիշեցնենք, որ Եվրո-2020-ի եզրափակիչի մյուս ուղեգիրը հուլիսի 7-ին «Ուեմբլիում» կվիճարկեն Անգլիայի և Դանիայի հավաքականները:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.