Եվրո-2020. Դանիա - Ֆինլանդիա հանդիպումը կշարունակվի այսօր

22:13   12 հունիսի, 2021

Ֆուտբոլի Դանիայի և Ֆինլանդիայի հավաքականների միջև Եվրո-2020-ի B խմբի առաջին տուրի հանդիպումը (0:0) կշարունակվի այսօր՝ հունիսի 12-ին: Խաղը կմեկնարկի Երևանի ժամանակով 22:30-ին, հայտնում է Եվրո-2020-ի մամուլի ծառայությունը:

Դանիայի մայրաքաղաք Կոպենհագենի «Պարկեն» ստադիոնում անցկացվող հանդիպումը դադարեցվել էր բժշկական նկատառումներով: Դանիայի հավաքականի կիսապաշտպան Կրիստիան Էրիկսենը կորցրել էր գիտակցությունն առաջին խաղակեսի վերջնամասում և ընկել խոտածածկին:

Բժիշկները պայքարում էին իտալական «Ինտերի» 29-ամյա ֆուտբոլիստի կյանքի համար՝ կատարելով սրտի մերսում: 

Էրիկսենին մոտ 20 րոպե խաղադաշտում բուժօգնություն ցուցաբերելուց հետո շտապօգնության մեքենայով տեղափոխել էին հիվանդանոց: Դանիայի հավաքականի ֆուտբոլիստները սպիտակ սավանով ծածկել էին պատգարակը: Դանիացին արդեն գիտակցության էր եկել:

Կրիստիան Էրիկսենի կինը տրիբունայից իջել էր խաղադաշտ: Դանիայի հավաքականի ֆուտբոլիստները փորձում էին հանգստացնել նրան: Կնոջը թույլ չէին տալիս մոտենալ ամուսնուն:

Դրանից հետո ՈւԵՖԱ-ն պաշտոնապես հայտարարել էր, որ ֆուտբոլիստի վիճակը կարգավորվել է:

Կրիստիան Էրիկսենի գործակալ Մարտին Շոտսը սոցցանցերում հայտնել է, որ կիսապաշտպանն արդեն ինքնուրույն շնչում է և հաղորդակցվում հարազատների հետ:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։