Բրունու Ֆերնանդեշը գերազանցեց Լեմպարդի ռեկորդը

«Մանչեսթեր Յունայթեդի» պորտուգալացի կիսապաշտպան Բրունու Ֆերնանդեշը «Լիվերպուլի» դեմ Անգլիայի առաջնության 34-րդ տուրի խաղում (2:4) խփած գոլի արդյունքում սահմանել է ռեկորդ:

Այս մրցաշրջանում դա «Մանչեսթեր Յունայթեդում» 26-ամյա պորտուգալացու 28-րդ գոլն էր բոլոր մրցաշարերում: Ֆերնանդեշը գերազանցել է Պրեմիեր լիգայի մեկ մրցաշրջանում կիսապաշտպանների արդյունավետության ռեկորդը, որը պատկանում էր Ֆրենկ Լեմպարդին: 2009/10թթ. մրցաշրջանում անգլիացի կիսապաշտպանը Լոնդոնի «Չելսիի» կազմում խփել էր 27 գոլ, հայտնում է Opta-ն:

Հիշեցնենք, որ այդ հաղթանակից հետո «Լիվերպուլը» (35 խաղ) 60 միավորով բարձրացավ 5-րդ տեղ և 4 միավոր է հետ չորրորդ տեղում ընթացող «Չելսիից» (36 խաղ)։ Երկրորդ տեղում գտնվող «Մանչեսթեր Յունայթեդն» (36 խաղ) ունի 70 միավոր ու 4 միավոր է առաջ երրորդ տեղը զբաղեցնող «Լեսթեր Սիթիից» (36 խաղ)։