Յուրչենկո․ Իսլանդիայի հավաքականին հաղթեց ամբողջ հայ ժողովուրդը

Հայաստանի հավաքականի եւ «Ալաշկերտի» դարպասապահ Դավիթ Յուրչենկոն մեկնաբանել է 2։0 հաշվով հաղթանակը Իսլանդիայի հավաքականի նկատմամբ աշխարհի առաջնության ընտրական մրցաշարի երրորդ տուրում։

«Իհարկե, դիտել էինք իսլանդացիների խաղը։ Գիտեինք, որ դժվար խաղ է լինելու պայքարի, լարվածության տեսանկյունից։ Գիտեինք, որ նրանք կվազեն եւ շատ օդային փոխանցումներ կկատարեն։ Փառք Աստծո, մեզ համար ամեն ինչ հաջող ավարտվեց, 2 գեղեցիկ գոլ խփեցինք, հաղթեցինք 2։0 հաշվով։

Շատերը ցավում էին մեզ համար տրիբունաներում կամ իրենց բնակարաններում, այդ թվում՝ մեր ընտանիքները եւ հարազատները։ Կարող եմ ասել, որ Իսլանդիայի հավաքականին հաղթեց ամբողջ հայ ժողովուրդը»,- ասել է Յուրչենկոն։

ԱԱ-2022-ի ընտրական փուլի J խմբի երկրորդ տուրից հետո Հայաստանի ու Գերմանիայի հավաքականներն ունեն 6-ական միավոր, Ռումինիան ու Հյուսիսային Մակեդոնիան՝ 3-ական, իսկ Իսլանդիան ու Լիխտենշտեյնը կրել են 2 պարտություն: Մարտի 31-ին Հայաստանի թիմը կընդունի ռումինացիներին։