Կապառոսը՝ Հայաստանի հավաքականի ֆուտբոլիստներին. Դուք ապացուցեցիք, որ իսկական կոլեկտիվ եք

Ֆուտբոլի Հայաստանի ազգային հավաքականի գլխավոր մարզիչ Խոակին Կապառոսն Իսլանդիայի հավաքականի դեմ 2022թ. ֆուտբոլի աշխարհի առաջնության ընտրական փուլի J խմբի երկրորդ տուրի հանդիպումից առաջ տեսանյութ է հրապարակել Ինստագրամում:

«Լիխտենշտեյնի դեմ խաղից առաջ զրույց Հայաստանի հավաքականի ֆուտբոլիստների հետ»,- տեսանյութին կից գրել է իսպանացի մասնագետը:

«Ազգերի լիգայի խաղերից հետո ես չկարողացա նորմալ հրաժեշտ տալ ձեզ: Ես ձեզ պարտք եմ և ցանկանում եմ շնորհակալություն հայտնել ձեզ: Դուք ապացուցեցիք, որ իսկական կոլեկտիվ եք, որն ունի համախմբվածություն: Դուք ընկերների խումբ եք»,- տեսանյութում ասում է Կապառոսը:

Հայաստան - Իսլանդիա հանդիպումը տեղի կունենա Երևանի «Հանրապետական» ստադիոնում և կմեկնարկի Երևանի ժամանակով 20:00-ին: Խաղը կսպասարկեն ալբանացի մրցավարներ՝ 36-ամյա Էնեա Ջորջիի գլխավորությամբ: Էնեա Ջորջին այս մրցաշրջանում սպասարկել էր նաև «Արարատ-Արմենիայի» ու Լյուքսեմբուրգի չեմպիոն «Ֆոլայի» միջև Եվրոպայի լիգայի որակավորման երկրորդ փուլի հանդիպումը, որն անցկացվել էր Երևանում:

Հիշեցնենք, որ ԱԱ-2022-ի ընտրական փուլի առաջին տուրում Խոակին Կապառոսի գլխավորած թիմը նվազագույն հաշվով արտագնա հաղթանակ էր տարել Լիխտենշտեյնի հավաքականի նկատմամբ, իսկ իսլանդացիները հյուրընկալվելիս 0:3 հաշվով պարտվել էին Գերմանիայի հավաքականին: