«Բարսելոնան» 6 գոլ խփեց «Ռեալ Սոսյեդադին», Մեսին գերազանցեց Չավիի ռեկորդը (տեսանյութ)
01:53 22 մարտի, 2021Ֆուտբոլի Իսպանիայի առաջնության 28-րդ տուրի վերջին խաղում «Բարսելոնան» հյուրընկալվեց Սան Սեբաստիանի «Ռեալ Սոսյեդադին» և վստահ հաղթանակ տարավ 6:1 հաշվով: Կատալոնական ակումբի կազմում դուբլի հեղինակ դարձան արգենտինացի հարձակվող Լիոնել Մեսին ու ամերիկացի պաշտպան Սերժինյո Դեստը, իսկ ֆրանսիացիներ Անտուան Գրիզմանն ու Ուսման Դեմբելեն խփեցին մեկական գոլ: 20-ամյա Դեստը պատմության առաջին ամերիկացի ֆուտբոլիստն է, որ դուբլի հեղինակ է դառնում Լա Լիգայում:
33-ամյա Մեսին դարձավ «Բարսելոնայի» պատմության մեջ ամենաշատ հանդիպում անցկացրած ֆուտբոլիստը: Նա 768-րդ խաղն անցկացրեց կատալոնական ակումբում ու գերազանցեց իսպանացի լեգենդար կիսապաշտպան Չավի Էրնանդեսի ռեկորդը:
Մեսին ընթացիկ մրցաշրջանում գոլերի թիվը հասցրեց 23-ի և միանձնյա գլխավորում է ռմբարկուների ցուցակը: «Բարսելոնայում» 768-րդ խաղում նա գոլերի թիվը հասցրեց 663-ի:
Այս հաղթանակից հետո «Բարսելոնան» վաստակեց 62 միավոր և, շրջանցելով Մադրիդի «Ռեալին», բարձրացավ երկրորդ տեղ: Առաջատար Մադրիդի «Աթլետիկոն» ունի 66 միավոր, իսկ «Ռեալ Սոսյեդադը» 45 միավորով չորրորդն է:
Իսպանիայի առաջնություն, 28-րդ տուր
«Ռեալ Սոսյեդադ» - «Բարսելոնա»՝ 1:6 (տեսանյութ)
Անդեր Մուգուրուսա, 77 – Անտուան Գրիզման, 37, Սերժինյո Դեստ, 43, 53, Լիոնել Մեսի, 56, 89, Ուսման Դեմբելե, 71
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.