«Բարսելոնայի» հոլանդացի գլխավոր մարզիչ Ռոնալդ Կումանը մեկնաբանել է ակումբի նախկին նախագահ Խոսեպ Մարիա Բարտոմեուի ձերբակալությունը։
«Ակնհայտ է, որ «Բարսելոնայի» հեղինակության համար տեղի ունեցածը լավ չէ։ Մենք պետք է սպասենք եւ տեսնենք, թե ինչ շարունակություն կլինի։ Պետք է պատրաստ լինենք վաղվան եւ մեր աշխատանքն անենք այնքան լավ, ինչքան հնարավոր է։
Բարտոմեուն միշտ առանձնահատուկ մարդ է եղել ինձ համար»,– Կումանի խոսքը մեջբերում է Sport.es–ը։
Հիշեցնենք, որ Բարտոմեուի նախաձեռնությամբ է Կումանն անցած ամռանը նշանակվել կատալոնական ակումբի գլխավոր մարզիչ։
Մարտի 1-ին Բարտոմեուն, «Բարսելոնայի» գլխավոր տնօրեն Օսկար Գրաուն և փաստաբանական ծառայության ղեկավար Ռոման Գոմես Պենտին ձերբակալվել էին կոռուպցիայի կասկածանքով: Ձերբակալությունները տեղի էին ունեցել «Բարսելոնայի» գրասենյակներում անցկացված խուզարկություններից հետո: Նրանց բաց են թողել գրավի դիմաց։
Իսպանական մամուլը ենթադրություն էր արել, որ ձերբակալությունները կապված են 2020-ի փետրվարին անօրինական վճարումների միջոցով սոցցանցերում Բարտոմեուի իմիջը բարձրացնելու, արգենտինացի հարձակվող Լիոնել Մեսիին ու իսպանացի պաշտպան Ժերար Պիկեին վարկաբեկելու արշավներ ֆինանսավորելու հետ։
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։