«Ռեալը» հրաժարվել է վաճառել Կազեմիրոյին, պատրաստ է քննարկել Բեյլի եւ Իսկոյի տրանսֆերը

Մադրիդի «Ռեալը» հրաժարվել է վաճառել բրազիլացի կիսապաշտպան Կազեմիրոյին։ 28-ամյա ֆուտբոլիստի տրանսֆերի վերաբերյալ Արքայական ակումբն առաջարկ է ստացել Ֆրանսիայի չեմպիոն ՊՍԺ-ից, սակայն մերժել է, հաղորդում է իսպանական Marca-ն։

«Ռեալն» առաջիկա տրանսֆերային պատուհանների ժամանակ էլ չի նախատեսում Կազեմիրոյի վաճառքը։ Transfermarkt-ը նրա տրանսֆերի արժեքը գնահատում է 70 միլիոն եվրո։

Ամռանը իսպանական ակումբը տրանսֆերի կհանի ուելսցի ենթահարձակվող Գարեթ Բեյլին, որը այս մրցաշրջանի ավարտից հետո կվերադառնա Լոնդոնի «Տոտենհեմից», որտեղ հանդես է գալիս վարձակալությամբ։ Մադրիդյան ակումբը պատրաստ է վաճառել նաեւ իսպանացի կիսապաշտպան Իսկոյին։