Գևորգ Ղազարյան. ԱԵԼ-ի մարզիչի հետ զրույցից հետո որոշեցի հեռանալ

23:46   1 փետրվարի, 2021

Ֆուտբոլի Հայաստանի ազգային հավաքականի կիսապաշտպան Գևորգ Ղազարյանը Եվրոպայում տրանսֆերային պատուհանի վերջին օրը Կիպրոսի ԱԵԼ-ից տեղափոխվեց հունական «Լամիա», որը մինչև ընթացիկ մրցաշրջանի ավարտը վարձակալել է նրան:

NEWS.am Sport-ի թղթակցի հետ զրույցում 32-ամյա ֆուտբոլիստը խոսեց ԱԵԼ-ից հեռանալու պատճառների մասին:

«ԱԵԼ-ից հեռանալու որոշումն ընդունեցի մարզիչի հետ զրույցից հետո: Մարզիչն ասաց, որ չի պատրաստվում շատ խաղաժամանակ տրամադրել ինձ: Հարցական էր, թե խաղալու դեպքում որքան էի խաղալու, այդ պատճառով որոշեցի հեռանալ»,- նշեց Ղազարյանը:

Հունաստանում Գևորգ Ղազարյանը 2014-2015-ը հանդես է եկել նաև «Օլիմպիակոսում» ու «Կերկիրայում»: Կիսապաշտպանի խոսքով, կային կարիերան շարունակելու առաջարկներ տարբեր երկրներից, սակայն նրա ընտրությունը հունական ակումբի վրա կանգ առավ մարզիչի պատճառով: «Լամիան» գլխավորում է 47-ամյա հույն մասնագետ Միչալիս Գրիգորիուն, որի գլխավորությամբ Ղազարյանը 2015-ին հանդես է եկել «Կերկիրայում»:

«Կային առաջարկներ տարբեր երկրներից: ԱԵԼ-ում ինձ առաջարկեցին տեղափոխվել կիպրոսյան թիմերից մեկը, բայց ես չընդունեցի այդ առաջարկը: Ունեի առաջարկներ նաև Իսրայելից ու Ղազախստանից: «Լամիայի» մարզիչի հետ նախկինում աշխատել եմ «Կերկիրայում»: Հաճելի է, որ դարձյալ աշխատելու եմ նրա հետ: Լավ եմ հիշում Հունաստանի առաջնությունը: Այս ընթացքում հետևել եմ առաջնությանը և կարող եմ ասել, որ այն լավ մակարդակի վրա է: Անհամբերությամբ սպասում եմ թիմի առաջիկա խաղերին, որպեսզի ունենանք շատ հաղթանակներ, կատարենք առաջադրանքը և պահպանենք տեղն ուժեղագույնների լիգայում»,- նշեց Գևորգ Ղազարյանը:

Հիշեցնենք, որ Գևորգ Ղազրայանը 2019-ին էր միացել ԱԵԼ-ին: Նախորդ տարվա հունիսին նա երկարաձգել էր ակումբի հետ գործող պայմանագիրը, որը նախատեսված է մինչև 2023 թվականը: Կիպրոսի ընթացիկ առաջնությունում հայ կիսապաշտպանը մասնակցել է 6 խաղի և դարձել մեկ գոլի հեղինակ:

Նախկինում Ղազարյանը խաղացել է նաև Երևանի «Փյունիկում», Դոնեցկի «Մետալուրգում», Կարագանդայի «Շախտյորում», հունական «Օլիմպիակոսում», «Կերկիրայում», պորտուգալական «Մարիտիմոյում» ու «Շավիշում»:

Հունաստանի ընթացիկ առաջնությունում «Լամիան» 18 խաղից հետո 11 միավորով նախավերջին՝ 13-րդ տեղում է: Լամիա քաղաքը ներկայացնող թիմը հաջորդ հանդիպումը կանցկացնի փետրվարի 6-ին՝ ընդունելով «ԱԵԼ Լարիսային»:

Դավիթ Եղիազարյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.