ՀԱՕԿ․ Մեր ժողովրդի սիրտը մխում է ծանր կորուստների համար, բայց չի ծնկում դաժան ճակատագրի առջև
23:11 31 դեկտեմբերի, 2020Հայաստանի ազգային օլիմպիական կոմիտեն հանդես է եկել ամանորյա ուղերձով․
«Անցնող տարին լի էր հիասթափություններով ու դառնություններով։ Դրանք հայտնի են բոլորին։ Մեր ժողովրդի սիրտը մխում է ծանր կորուստների համար, բայց նա չի ծնկում դաժան ճակատագրի առջև։ Չեն հուսալքվում նաև մարզաշխարհի մարդիկ։ Նրանք ընկածների հիշատակը հավերժացնելու համար վրեժխնդիր կլինեն հաղթանակներով։
Հայ ժողովուրդը մշտապես որոնում, ուղիներ է գտնում, համառ, քրտնաթոր ու նպատակային աշխատանքով հասնում է ցանկալի արդյունքի։
Հայրենական սպորտը կշարունակի իր վերընթացը ու պատվով դուրս կգա դժվարին իրավիճակներից։
2021 թվականը Օլիմպիական խաղերի տարի է։ Բնագավառի մարդիկ հաջողություն կունենան վարկանիշային մրցաշարերում, իրենց ունակությունները կդրսևորեն Տոկիոյի մրցասպարեզներում ու պարզճակատ կվերադառնան հայրենիք։
Հայաստանի պատվիրակները միջազգային մրցասպարեզներում նվաճումներով կապացուցեն իրենց առաքելությունը։ Նրանք հասկանում, գնահատում են մեր օրհներգի ու եռագույնի արժեքը։
Շնորհավորում ենք հայոց մարզաշխարհի մարդկանց, համայն հայության Ամանորն ու Սուրբ ծնունդը:
Թող արգասաբեր լինի 2021 թվականը և այն բերկրանք ու հպարտություն պարգևի հայ մարզիկներին ու ժողովրդին»:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։