Հայաստանի ֆուտբոլի ֆեդերացիայի նախագահ Արմեն Մելիքբեկյանը հեռավար մամուլի ասուլիսում պատասխանել է լրատվամիջոցների ուղարկած հարցերին։
Արմեն Մելիքբեկյանը շնորհակալություն է հայտնել ազգային հավաքականի իսպանացի գլխավոր մարզիչ Խոակին Կապառոսին, որը կորոնավիրուսի համավարակով եւ ռազմական դրության պայմաններում ստեղծել մարտունակ թիմ եւ հաղթել Ազգերի լիգայի C դիվիզիոնի խմբում։
Արմեն Մելիքբեկյանը հերքել է լուրերը, որ ՀՖՖ-ն այդ հաջողության համար ՈւԵՖԱ-ից ստացել է 2 միլիոն 250 հազար եվրո։
«Ազգերի լիգայի խմբային փուլում առաջին տեղ գրավելու համար մենք չենք ստացել ՈւԵՖԱ-ից 2 միլիոն 250 հազար եվրո պարգեւավճար։ Մենք ստանում ենք հեռուստաիրավունքի վաճառքից եւ այլ հատկացումներից սահմանված գումար, իսկ այդ գումարը չենք ստացել»,- նշել է Մելիքբեկյանը։
Հայկական ֆուտբոլի ղեկավարը հայտնել է, որ Հայաստանի հավաքականը շարունակում է բանակցել դրսում հանդես եկող ազգությամբ հայ երիտասարդ ֆուտբոլիստների հետ։
«Ազգային հավաքականի հնարավոր նորեկների հետ խոսում ենք։ Էդուարդ Սպերցյանի հետ հաջորդ տարվա սկզբին առարկայական կխոսենք։ Կապառոսը երիտասարդ ֆուտբոլիստների է ներգրավում Հայաստանի առաջնության թիմերից եւ կշարունակի այդ պրակտիկան»,- ասել է ՀՖՖ նախագահը։
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։