«Ռոման» մտադիր է երկարաձգել պայմանագիրը Հենրիխ Մխիթարյանի հետ

«Ռոման» մտադիր է երկարաձգել պայմանագիրը Հայաստանի հավաքականի կիսապաշտպան Հենրիխ Մխիթարյանի հետ, հաղորդում է gazetta.it-ը։

31-ամյա ֆուտբոլիստի գործող պայմանագիրը հռոմեական ակումբի հետ նախատեսված է մինչեւ այս մրցաշրջանի ավարտը։ Պորտուգալացի Պաուլու Ֆոնսեկայի գլխավորած թիմը ցանկանում է եւս մեկ տարով երկարաձգել համագործակցությունը հայ խաղացողի հետ։

Ընթացիկ մրցաշրջանում Մխիթարյանը «Ռոմայի» հետ մասնակցել է 11 հանդիպման, խփել 6 գոլ, կատարել 5 գոլային փոխանցում։

Հիշեցնենք, որ Մխիթարյանը ակումբային կարիերայի ընթացքում հանդես է եկել նաեւ Երեւանի «Փյունիկում», Դոնեցկի «Մետալուրգում» եւ «Շախտյորում», Դորտմունդի «Բորուսիայում», անգլիական «Մանչեսթեր Յունայթեդում» եւ Լոնդոնի «Արսենալում»։