Գևորգ Ղազարյան. Շնորհավորում եմ բոլոր հայերին

Ֆուտբոլի Հայաստանի ազգային հավաքականի և Կիպրոսի ԱԵԼ-ի կիսապաշտպան Գևորգ Ղազարյանը գրառում է կատարել սոցցանցերում՝ մեկնաբանելով Ազգերի լիգայի խմբային փուլի վերջին՝ 6-րդ տուրի՝ Հյուսիսային Մակեդոնիայի դեմ խաղում Հայաստանի ազգային ընտրանու տարած հաղթանակը:

«Մենք արեցինք դա: Մենք առաջինն ենք: Լավագույնն առջևում է: Կրկնակի ուրախ կլինեինք, եթե հնարավորություն ունենայինք այս կարևոր նվաճումը նշել մեր երկրպագուների հետ:

Շնորհավորում եմ բոլոր հայերին»,- գրել է Ղազարյանը:

Ավելի վաղ հայտնի էր դարձել, որ 32-ամյա ֆուտբոլիստի մոտ կորոնավիրուս է հայտնաբերվել, ինչի պատճառով նա բաց է թողել Հյուսիսային Մակեդոնիայի դեմ Ազգերի լիգայի խմբային փուլի վերջին՝ 6-րդ տուրի հանդիպումը:

Հիշեցնենք, որ Հայաստանի հավաքականը հաղթանակ է տարել 1:0 հաշվով: 55-րդ րոպեին Հայաստանի հավաքականի միակ ու հաղթական գոլը խփել է Հովհաննես Համբարձումյանը:

Հայաստանի հավաքականը C դիվիզիոնի երկրորդ խմբում 11 միավորով գրավեց առաջին տեղը: Հյուսիսային Մակեդոնիան 9 միավորով մրցաշարային աղյուսակի երկրորդ տեղում է: Վրաստանը ունի 7 միավոր և երրորդ տեղում է, իսկ Էստոնիան 3 միավորով վերջին՝ չորրորդ տեղում է:

Մակեդոնացիների նկատմամբ հաղթանակը Հայաստանի հավաքականին հնարավորություն տվեց Ազգերի լիգայի հաջորդ մրցաշարում բարձրանալ B դիվիզիոն, որտեղ մրցակիցները կլինեն անհամեմատ ավելի ուժեղ: