23:54 18 նոյեմբերի, 2020Ֆուտբոլի Հայաստանի ազգային հավաքականի գլխավոր մարզիչ Խոակին Կապառոսը մեկնաբանել է Ազգերի լիգայի C դիվիզիոնի երկրորդ խմբում Հյուսիսային Մակեդոնիայի նկատմամբ տարած հաղթանակը:
«Հանդիպումը տևում է 90 րոպե: Առաջին խաղակեսում նրանք ավելի շատ էին տիրում գնդակին, սակայն երկրորդ խաղակեսում մեզ հաջողվեց ճնշել մրցակցին: Խփած գոլից հետո ֆուտբոլիստները սկսեցին ավելի վստահ զգալ իրենց:
Գոհ եմ մեր թիմի ցուցադրած խաղից: Սա երկարատև աշխատանքի արդյունք էր, որում իրենց ներդրումն են ունեցել ֆեդերացիայի ղեկավարությունը, ֆուտբոլիստները: Շատ վատ իրավիճակների միջով ենք անցել, ֆուտբոլիստներն էլ ունեին այդ զգացողությունը, սակայն մտովի էլ շատ ուժեղ էին պատրաստված: Ուրախ եմ մեր ֆուտբոլիստների, հայկական ֆուտբոլի համար, քանի որ քայլ առ քայլ նպաստում ենք հայկական ֆուտբոլի զարգացմանը:
Մենք ունենք մեր խաղաոճը, որը պետք է պահպանենք ու զարգացնենք: Հավաքական են հրավիրվում երիտասարդ ֆուտբոլիստներ, ինչը նպաստում է մրցակցությանը: Հայկական ֆուտբոլը զարգանում է, հետևաբար հավաքական հրավիրվող երիտասարդ ֆուտբոլիստների թիվը մեծանալու է:
Այս հաղթանակը շատ կարևոր էր, ֆուտբոլիստները պատմություն կերտեցին: Երեկ տեղեկացանք մեր նոր կորուստների մասին, ինչը ազդեցություն ունեցավ ֆուտբոլիստների վրա, սակայն մենք կարողացանք ավարտին հասցնել գործը: Հավաքականում խաղալն ու ակումբում խաղալը տարբեր են, այստեղ հաղթում է մի ամբողջ երկիր, և այսօր հաղթեց Հայաստանը: Մեր ֆուտբոլիստները հրաշալի աշխատանք կատարեցին, ինչի համար ես շատ ուրախ եմ»,- ասել է Կապառոսը:
Հիշեցնենք, որ Հայաստանի հավաքականը հաղթանակ է տարել 1:0 հաշվով: 55-րդ րոպեին Հայաստանի հավաքականի միակ ու հաղթական գոլը խփել է Հովհաննես Համբարձումյանը:
Հայաստանի հավաքականը C դիվիզիոնի երկրորդ խմբում 11 միավորով գրավեց առաջին տեղը: Հյուսիսային Մակեդոնիան 9 միավորով մրցաշարային աղյուսակի երկրորդ տեղում է: Վրաստանը ունի 7 միավոր և երրորդ տեղում է, իսկ Էստոնիան 3 միավորով վերջին՝ չորրորդ տեղում է:
Մակեդոնացիների նկատմամբ հաղթանակը Հայաստանի հավաքականին հնարավորություն տվեց Ազգերի լիգայի հաջորդ մրցաշարում բարձրանալ B դիվիզիոն, որտեղ մրցակիցները կլինեն անհամեմատ ավելի ուժեղ:
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.