19:01 9 հոկտեմբերի, 2020Ֆուտբոլի Հայաստանի ազգային հավաքականի հարձակվող Արթուր Միրանյանը ռուսական «Տամբովի» հետ փոխհամաձայնության է եկել տեղափոխության հարցում: Այդ մասին 24-ամյա ֆուտբոլիստը հայտնեց NEWS.am Sport-ի թղթակցի հետ զրույցում:
Հայաստանում հայտարարված ռազմական դրության պատճառով Միրանյանը դեռ չի կարողանում Երևանից մեկնել Ռուսաստան: Սպասվում է, որ նա առաջիկայում կմեկնի Տամբով և բուժզննում անցնելուց հետո պայմանագիր կկնքի Ռուսաստանի Պրեմիեր լիգայի ներկայացուցիչի հետ:
«Այս պահին Հայաստանի ֆուտբոլի ֆեդերացիան զբաղվում է այն հարցով, որպեսզի ստանամ Հայաստանից մեկնելու թույլտվություն և կարողանամ միանալ «Տամբովին»»,- զրույցում հայտնեց Արթուր Միրանյանը, որը վերջին շրջանում Երևանի «Փյունիկում» էր մարզվում մարզավիճակ պահպանելու համար:
Հիշեցնենք, որ այս տրանսֆերային պատուհանի ընթացքում «Տամբով» էին տեղափոխվել նաև Հայաստանի հավաքականի ֆուտբոլիստներ Ալեքսանդր Կարապետյանն ու Վարազդատ Հարոյանը:
Այս ամռանը Արթուր Միրանյանն ազատ գործակալի կարգավիճակով հեռացել էր «Փյունիկից»: Երևանյան ակումբում նա հանդես էր գալիս նախորդ 2 մրցաշրջաններում: Հայաստանի նախորդ առաջնությունում հարձակվողը մասնակցել է 13 խաղի և դարձել 6 գոլի ու մեկ գոլային փոխանցման հեղինալ:
Ուկրաինայի եւ Հայաստանի քաղաքացիություններ ունեցող Միրանյանը Դոնեցկի «Շախտյորի» սան է։ Ուկրաինական ակումբի երիտասարդական թիմում նա հանդես է եկել 2012-2014 թվականներին, իսկ 2011-2013-ը խաղացել է Ուկրաինայի պատանեկան հավաքականներում (Մ-17, Մ-18, Մ-19): 2014-2015-ը հայ հարձակվողը խաղացել է նաև մակեդոնական «Վարդարում»։ Հայաստանի հավաքականում Միրանյանը նորամուտը նշել է 2019 թվականին և անցկացրել մեկ հանդիպում:
Դավիթ Եղիազարյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.