Exclusive. Ալեքսանդր Կարապետյանը՝ վնասվածքով խաղալու ու «Սպարտակի» դեմ հանդիպումը բաց թողնելու մասին
16:27 26 սեպտեմբերի, 2020Հայաստանի ազգային հավաքականի և «Տամբովի» հարձակվող Ալեքսանդր Կարապետյանը Մոսկվայի «Սպարտակի» դեմ Ռուսաստանի առաջնության 9-րդ տուրի հանդիպումը բաց է թողնում ծնկի հետ կապված խնդիրների պատճառով: Այդ մասին 32-ամյա հարձակվողը հայտնեց NEWS.am Sport-ի թղթակցի հետ զրույցում:
«Ծնկի հատվածում ցավեր ունեմ: «Ռուբինի» դեմ օգոստոսի 30-ին կայացած խաղից հետո ցավեր ունեի, սակայն միացա Հայաստանի հավաքականին և մասնակցեցի խաղերին: Դրանից հետո ցավերն ուժեղացան, ինչի պատճառով որոշեցի դադար վերցնել և նորմալ վերականգնվել»,- զրույցում նշեց Ալեքսանդր Կարապետյանը:
Հարցին, թե կհասցնի վերականգնվել մինչև Հայաստանի հավաքականի առաջիկա խաղերը, ֆուտբոլիստը պատասխանեց. «Հուսով եմ»:
Հիշեցնենք, որ Ալեքսանդր Կարապետյանն այս ամռանը ռուսական «Սոչիից» էր տեղափոխվել «Տամբով», որի կազմում մասնակցել է Ռուսաստանի առաջնության 8 խաղի և դարձել 2 գոլի հեղինակ:
Հայաստանի հավաքականի առաջիկա խաղերը տեղի են ունենալու հոկտեմբերին: Հոկտեմբերի 7-ին Խոակին Կապառոսի գլխավորած թիմը Երևանում ընկերական հանդիպում կանցկացնի Ալբանիայի հավաքականի հետ, 4 օր անց Ազգերի լիգայում կմրցի Վրաստանի թիմի դեմ, իսկ հոկտեմբերի 14-ին կհյուրընկալվի էստոնացիներին:
Դավիթ Եղիազարյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.