Հովհաննես Համբարձումյան. Նորեկները նոր շունչ հաղորդեցին հավաքականին (ֆոտո)

Հայաստանի ազգային հավաքականի պաշտպան Հովհաննես Համբարձումյանն այս ամռանը Կիպրոսի «Էնոսիսից» տեղափոխվեց երկրի 13-ակի չեմպիոն «Անորտոսիս»: Կիպրոսի առաջնության մեկնարկային տուրերում 29-ամյա ֆուտբոլիստը խաղաժամանակ չի ստացել, բայց դա նրան չխանգարեց Հայաստանի հավաքականի մեկնարկային կազմում մասնակցել Հյուսիսային Մակեդոնիայի (1:2) և Էստոնիայի (2:0) հավաքականների դեմ Ազգերի լիգայի C դիվիզիոնի երկրորդ խմբի հանդիպումներին:

NEWS.am Sport-ի թղթակցի հետ զրույցում Հովհաննես Համբարձումյանն ամփոփեց նախորդ 2 խաղերը և պատմեց ակումբային գործերի մասին:

Տևական ընդմիջումից հետո Հայաստանի հավաքականն անցկացրեց հերթական խաղերը՝ հանդես գալով նոր մարզիչի գլխավորությամբ: Ըստ քեզ՝ նախորդ 2 խաղերում թիմը քանի տոկոսով ցուցադրեց իր ներուժը:

Կարծում եմ՝ այդպիսի տևական ընդմիջումից հետո թիմը շատ լավ տեսք ուներ ու լավ խաղ ցուցադրեց, սակայն, ամեն դեպքում, ավելացնելու տեղ դեռ շատ ունենք:

Խոակին Կապառոսն ինչ-որ նոր բան բերե՞ց Հայաստանի հավաքական: Մարզումային գործընթացն ու նախապատրաստական փուլը շա՞տ էր տարբերվում:

Նոր մարզիչի գալով միշտ նոր մտքեր ու մտահղացումներ են լինում հավաքականում, իսկ մենք փորձում ենք խաղադաշտում իրագործել բոլոր առաջադրանքները:

Հյուսիսային Մակեդոնիայի և Էստոնիայի դեմ խաղերում Հայաստանի հավաքականը հանդես եկավ առանց մի քանի առանցքային խաղացողների, որոնց թվում էր նաև Հենրիխ Մխիթարյանը: Որքանո՞վ հաջողվեց լրացնել այդ բացը:

Մեր հավաքականն ավելի վստահ ու հզոր է դառնում Մխիթարյանի հետ, նա մեր թիմի ավագն ու առաջատարն է: Հավատում ենք, որ Հենրիխի ու մյուս բացակա խաղացողների գալով մենք ավելի կուժեղանանք և կցուցադրենք ավելի դիտարժան ու վստահ խաղ:

Այս հավաքին մասնակցում էին մի շարք նորեկներ: Կարելի՞ է ասել, որ նրանք զգալիորեն ուժեղացրել են Հայաստանի հավաքականը: Նորեկներից ո՞վ թողեց ամենալավ տպավորությունը:

Նոր խաղացողները նոր շունչ ու եռանդ հաղորդեցին թիմին: Չեմ առանձնացնի որևէ մեկին: Բոլորն էլ լավ տպավորություն թողեցին: Բոլոր նորեկներն էլ ամբողջությամբ նվիրվեցին գործին և ամեն ինչ արեցին թիմային հաջողության համար:

Ազգերի լիգայում Հայաստանի հավաքականի առաջիկա մրցակիցը Վրաստանն է, որին շատերը համարում են խմբի ֆավորիտը: Առաջիկա խաղերում առաջին հերթին որտե՞ղ պետք է ավելացնել, որպեսզի թիմը ցուցադրի ավելի տպավորիչ խաղ:

Ըստ իս՝ մեր խմբում ֆավորիտ չկա: Բոլոր թիմերն էլ լավն են: Յուրաքանչյուր խաղում պետք է պայքարենք ու նվիրվենք հաղթանակի հասնելու համար: Եթե դա հաջողվի, կարող ենք հաղթել այս խմբում:

Եվրո-2020-ի ընտրական փուլի վերջին 2 խաղերում դաշտ էիր դուրս եկել Հայաստանի հավաքականի ավագի թևկապով: Ի՞նչ է զգում ֆուտբոլիստը, երբ առաջին անգամ ազգային թիմին դաշտ է դուրս բերում որպես թիմի ավագ:

Ազգային հավաքականի ավագի թևկապով հանդես գալը մեծ պատիվ ու պատասխանատվություն է: Ես շատ ուրախ ու հպարտ եմ, որ ունեցա այդպիսի պատիվ: Դժվար է բառերով նկարագրել այդպիսի զգացողությունները:

Իտալիայի հավաքականից կրած պարտությունը մոռանալ ստացվե՞լ է:

Փորձում եմ մոռանալ այդ մղձավանջային խաղը, սակայն հիշելու դեպքում շատ վատ ու ցավալի հիշողություններ են բոլորիս համար: Ամեն դեպքում, պետք է մոռանալ բոլոր պարտությունները, վերլուծել սխալներն ու շարժվել առաջ:

Կիպրոսի առաջնության մեկնարկային 3 տուրերում փոխարինողների թվում էիր, բայց խաղադաշտ դուրս չեկար: Ըստ քեզ՝ ինչո՞վ է պայմանավորված դա:

«Անորտոսիսում» շատ են բարձրակարգ խաղացողները և թեժ մրցակցություն է ընթանում ցանկացած խաղային դիրքի համար, իսկ ես դեռ շարունակում եմ հարմարվել նոր թիմին: Ջանասիրաբար մարզվում եմ և սպասում իմ հնարավորությանը: Կարող եմ ասել, որ ամեն ինչ անում եմ լավ մարզավիճակում մնալու համար:

«Էնոսիսից» հեռանալուց հետո ազատ գործակալի կարգավիճակում էիր և առաջարկներ ունեիր նաև արտասահմանից: Ինչո՞ւ որոշեցիր մնալ Կիպրոսում:

Ազատ գործակալի կարգավիճում մնալը երկար չտևեց: Ունեի կարիերաս շարունակելու մի քանի տարբերակներ, բայց ստացա առաջարկ «Անորտոսիսից», որը բարձրակարգ ակումբ է և միշտ պայքարում է բարձր տեղերի համար: Սա մեծ ամբիցիաներով ակումբ է, որի առաջարկը դժվար էր մերժել:

Դավիթ Եղիազարյան