«Ուրարտուն» նոր ձեռքբերում ունի

Երևանի «Ուրարտուն» պայմանագիր է ստորագրել ռուս կիսապաշտպան Մաքսիմ Մաշնյովի հետ, տեղեկացնում է ակումբի մամուլի ծառայությունը:

«Տեղափոխությունն «Ուրարտու» ինձ համար քայլ է դեպի առաջ, որովհետև այստեղ եվրոգավաթներում խաղալու հնարավորություն կա, բոլորին չէ, որ տրվում է նման շանս։ Ակումբի կազմում անցկացրած մի քանի մարզումից հասկացել եմ, որ ոչ թե նպատակը, այլ առաջադրված խնդիրը հնարավորինս վեր բարձրանալն է, լավ արդյունք ցույց տալը, որպեսզի դուրս գանք եվրոգավաթներ, առաջնությունում պայքարենք բարձր հորզիոնականների համար, չեմպիոնության համար, նույնը վերաբերում է նաև գավաթի խաղարկությանը: Հիմա դրա համար արվում է ամեն ինչ»,- նշել է 27-ամյա կիսապաշտպանը։

Մաշնյովի վերջին ակումբը «Չայկան» է, որի կազմում նա Ռուսաստանի Ֆուտբոլի ազգային լիգայի նախորդ առաջնությունում անցկացրել էր 23 հանդիպում ու դարձել 2 գոլի հեղինակ։

Մաշնյովը հանդես է եկել ռուսական մի շարք այլ ակումբներում Վլադիվոստոկի «Լուչում», «Բայկալում» և Տուլայի «Արսենալում»։