Ազատ ոճի ըմբշամարտի Հայաստանի հավաքականում կորոնավիրուսի թեստերի պատասխաններից մեկը դրական է

19:24   8 հուլիսի, 2020

Մեկ դրական թեստի պատասխան ունենք, մյուս բոլորիս պատասխանները բացասական են եկել: Դրական թեստ ունեցող մարզիկը կրկնակի թեստ կհանձնի: Մենք կմեկնենք հավաքի:

Այս մասին NEWS.am Sport-ի թղթակցի հետ զրույցում ասաց ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանը:

Ազատ ոճի ըմբշամարտի Հայաստանի հավաքականը հուլիսի 8-ից երկշաբաթյա հավաքի կանցկացնի Ծաղկաձորի մարզաբազայում:

NEWS.am Sport-ին գլխավոր մարզիչ Հաբեթնակ Կուրղինյանը հայտնել էր, որ նախքան հավաքի մեկնելը հուլիսի 7-ին հավաքականի բոլոր անդամներն ու մարզչական շտաբը կորոնավիրուսի թեստ են հանձնել:

«Թեստի պատասխաններն այսօր ենք ստացել: Ունենք մեկ դրական պատասխան: Մարզիկը, ում մոտ գրանցվել է դրական պատասխան, հավաքի չի մասնակցի: Նա կրկնակի թեստ կհանձնի: Եթե պատասխանը բացասական գա, նա նույնպես կմիանա հավաքին: Թիմը Ծաղկաձոր է մեկնում այսօր: Հույս ունենք, որ թեստի պատճառով է դրական արդյունք գրանցվել եւ կրկնակի թեստի պատասխանը բացասական կլինի»,- ասաց Հաբեթնակ Կուրղինյանը:

Հիշեցնենք, որ 3-ամսյա դադարից հետո ըմբիշներն առաջին անգամ են հավաք կազմակերպում: Մինչ այս ինչպես ազատ, այնպես էլ հունահռոմեական ոճի ըմբիշները մարզվում էին բացօթյա պայմաններում, անհատական ծրագրով, առանց գորգային մարզումների:

Հուլիսի 15-ից Ծաղկաձորում երկշաբաթյա հավաք կսկսի նաեւ հունահռոմեական ոճի ըմբշամարտի Հայաստանի հավաքականը Էդուարդ Սահակյանի գլխավորությամբ: Հունահռոմեականները նույնպես կթեստավորվեն նախքան մարզաբազա մեկնելը: Երկու հավաքականների հավաքները կանցկացվեն փակ, մեկուսացված պայմաններում:

Լուսինե Շահբազյան



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։