Հունահռոմեական ըմբշամարտի Հայաստանի հավաքականի մարզիչ Սամվել Գեւորգյանը 50 տարեկան է

22:16   30 հունիսի, 2020

Հունահռոմեական ըմբշամարտի Հայաստանի հավաքականի մարզիչ, Հայաստանի ըմբշամարտի ֆեդերացիայի փոխնախագահ Սամվել Գեւորգյանը հունիսի 30-ին նշում է ծննդյան 50-ամյակը:

Սամվել Գեւորգյանը Հայաստանի վաստակավոր մարզիչ է, 20 տարի ազգային հավաքականում զբաղեցնում է գլխավոր մարզիչի օգնականի՝ երկրորդ մարզիչի պաշտոնը․ Երեւանի հունահռոմեական ըմբշամարտի ֆեդերացիայի նախագահն է եւ Նորայր Մուշեղյանի անվան մարզադպրոցի տնօրենը:

Սամվել Գեւորգյանը ըմբշամարտով սկսել է զբաղվել 8 տարեկանից մարզիչներ Գագիկ Խաչատրյանի եւ այժմ Հայաստանի հավաքականի գլխավոր մարզիչ Էդուարդ Սահակյանի ղեկավարությամբ:

Մարզական կարիերայի ընթացքում եղել է Հայաստանի պատանիների չեմպիոն եւ մրցանակակիր, համամիութենական երիտասարդական մրցաշարերի բազմակի հաղթող: Սպորտի վարպետ է:

1990-ականներից զբաղվել է մարզչությամբ: Ֆեդերացիայում սկսել է աշխատել 1998 թվականից Բենուր Փաշայանի եւ Ստեփան Սարգսյանի ղեկավարությամբ, ապա հիմնադրել է Երևանի ըմբշամարտի ֆեդերացիան:

2001 թվականից պաշտոնապես Հայաստանի ազգային հավաքականի երկրորդ մարզիչն է: Սամվել Գեւորգյանի սաներն են եղել աշխարհի չեմպիոն Վաղինակ Գալստյանը, Եվրոպայի կրկնակի չեմպիոն Կարեն Մնացականյանը, Պեկին-2008-ի Օլիմպիական խաղերի բրոնզե մեդալակիր Յուրի Պատրիկեեւ, Ռիո-2016 Օլիմպիական խաղերի փոխչեմպիոն Միհրան Հարությունյան, Եվրոպայի բրոնզե մեդալակիր Կարեն Ասլանյան, Մ23 աշխարհի բրոնզե մեդալակիր Դավիթ Օվասապյանը:

2015-ին Բաքվում տեղի ունեցած առաջին Եվրոպական խաղերում Միհրան Հարությունյանը Սամվել Գեւորգյանի գլխավորությամբ նվաճեց Հայաստանի հավաքականի միակ արծաթե մեդալն այդ Խաղերում:

Այդ ժամանակ թիմին Բաքու ուղեկցեց Սամվել Գեւորգյանը, քանի որ հավաքականի գլխավոր մարզիչը հրաժարվել էր թիմին տանել Բաքու:

Վաստակավոր մարզիչին ծննդյան կապակցությամբ շնորհավորել են Հայաստանի, Ռուսաստանի անվանի ըմբիշներ, Հայաստանի հավաքականի անդամներ:

Լուսինե Շահբազյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.