NEWS.am Sport-ը շարունակում է ներկայացնել արտերկրում հանդես եկող պատանի հայ ֆուտբոլիստների, որոնք ցանկանում են ապագայում խաղալ Հայաստանի ազգային հավաքականում։
Ֆրանսիական Blois Football 41 ակումբի երկրորդ թիմում հանդես է գալիս 19-ամյա հայ հարձակվող Աշոտ Սիմոնյանը:
«Ծնվել եմ 2001 թվականի մարտի 21-ին Երևանում, խաղում եմ հարձակվողի դիրքում: Մինչև ֆուտբոլը ես Հրանտ Շահինյանի անվան մարզադպրոցում զբաղվել եմ սպորտային մարմնամարզությամբ: Այդ փորձը դրական հետևանք է ունեցել իմ արագության և ճկունության վրա:
Ֆուտբոլով սկսել եմ զբաղվել 12 տարեկանից «Էրեբունու» դպրոցում, որտեղ անցկացրել եմ 2 տարի: Ես հնարավորություն եմ ունեցել տեղափոխվել «Փյունիկ» կամ «Բանանց», սակայն որոշեցի կարիերաս շարունակել Ֆրանսիայում:
2016 թվականին տեղափոխվել եմ US Vendôme, իսկ 1 տարի անց՝ Vineuil SF, որի կազմում ճանաչվել եմ Մ-17 տարեկանների առաջնության լավագույն ռմբարկու և ընդգրկվել 2017/18 մրցաշրջանի խորհրդանշական հավաքականում:
Այնուհետև ես առաջարկ ստացա մեր շրջանի լավագույն ակումբից՝ Blois Football 41-ից: 2018/19 մրցաշրջանում մենք դարձանք Մ-18 տարեկանների առաջնության չեմպիոն: Մրցաշրջանի ավարտից հետո տեղափոխվեցի ակումբի երկրորդ թիմ, որտեղ խաղում եմ մինչ օրս: Blois Football 41-ի հիմնական թիմը հանդես է գալիս Ֆրանսիայի National 2 լիգայում և հավակնում է National 1 բարձրանալուն:
Կորոնավիրուսի պանդեմիայի պատճառով վաղաժամ ավարտված առաջնությունում ես 7 խաղում դարձել եմ 4 գոլի հեղինակ՝ ճանաչվելով մրցաշարի երրորդ լավագույն ռմբարկու և իմ թիմի լավագույն ֆուտբոլիստ: Կրկին ընդգրկվել եմ մրցաշրջանի խորհրդանշական հավաքականում: Լավագույն ռմբարկուն մասնակցել է 11 հանդիպման՝ խփելով 7 գոլ:
Հուսով եմ, որ շուտով հրավեր կստանամ Հայաստանի երիտասարդական հավաքականից: Դա մեծ պատիվ ու հպարտության առիթ կլինի ինձ համար: Կապի մեջ եմ ՀՖՖ ներկայացուցիչների հետ: Հնարավոր է, որ շուտով վերադառնամ Հայաստան, քանի որ շատ եմ սիրում իմ երկիրը », - նշել է Աշոտ Սիմոնյանը:
Սամվել Սուքիասյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։