Լինեկեր․ Ռոնալդուն հիացնում է, բայց Մեսին լավագույնն է պատմության մեջ

Ֆուտբոլի Անգլիայի հավաքականի եւ «Բարսելոնայի» նախկին հարձակվող, բրիտանացի հեռուստամեկնաբան, 59-ամյա Գարի Լինեկերը համեմատել է Իսպանիայի չեմպիոն «Բարսելոնայի» արգենտինացի հարձակվող Լիոնել Մեսիին եւ Իտալիայի չեմպիոն Թուրինի «Յուվենտուսի» պորտուգալացի հարձակվող Կրիշտիանու Ռոնալդուն։

«Մեսին լավագույնն է երբեւէ ֆուտբոլ խաղացածներից, այնպես, ինչպես Մայքլ Ջորդանը բասկետբոլում։ Ռոնալդուն հիացնում է, բայց եթե մենք խոսում ենք ֆուտբոլի պատմության մեջ լավագույն խաղացողի մասին, ապա վիճաբանությունները տեղին չեն։ Մեսին է լավագույնը։

Շատերն են Մեսիին կշտամբում, որ նա հաղթել է բացառապես «Բարսելոնայի» հետ, իսկ Ռոնալդուն տիտղոսներ է նվաճել տարբեր ակումբների եւ Պորտուգալիայի հավաքականի հետ։ Բայց ես այդ դիրքորոշումը համարում եմ տարօրինակ։ Իհարկե, Մեսիի հետ խաղում են տաղանդավոր ֆուտբոլիստներ, բայց նրա վիճակագրությունը անհավանական է»,- Լինեկերի խոսքը մեջբերում է BBC-ն։

Լինեկերը Անգլիայում հավաքականում հանդես է եկել 1984-1992-ին, «Բարսելոնայում»՝ 1986-1989-ին։ Ակումբային կարիերայի ընթացքում ներկայացրել է նաեւ «Լեսթեր Սիթին», «Էվերտոնը», «Տոտենհեմը», ճապոնական «Նագոյան»։