«Բացահայտելով տաղանդների». Հայ կիսապաշտպանը Ռուսաստանից (ֆոտո)

11:11   27 մայիսի, 2020

NEWS.am Sport-ը շարունակում է ներկայացնել արտերկրում հանդես եկող պատանի հայ ֆուտբոլիստների, որոնք ցանկանում են ապագայում ներկայացնել Հայաստանի ազգային հավաքականը։

ПФЛ-ը (Ռուսաստանի երկրորդ դիվիզիոն) ներկայացնող Ստավրոպոլի «Դինամոյում» հանդես է գալիս 18-ամյա հայ հենակետային կիսապաշտպան Վիկտոր Ավետիքովը:

«Ծնվել եմ 2001 թվականի սեպտեմբերի 19-ին Կուրսկայայում (Ստավրոպոլի երկրամաս): Ապրել եմ մորս հետ, որն էլ ինձ իմ խնդրանքով տարել է ֆուտբոլային դպրոց, երբ ես 6 տարեկան էի:

5 տարի անց տեղափոխվեցինք Ստավրոպոլ: Ընդունվեցի ДЮСШ «Кожаный мяч», սկզբնական շրջանում խաղում էի հարձակվողի դիրքում: Ես կարճ ժամանակում առաջընթաց գրանցեցի և 13 տարեկանում դարձա իմ տարիքային խմբի թիմի ավագը: Այնուհետև մարզիչն իմ մեջ նկատեց խաղադաշտի կենտրոնում խաղալու հմտություններ և ինձ տեղափոխեց կիսապաշտպանություն:

14 տարեկանում հնարավորություն ունեի տեղափոխվել «Կրասնոդար» կամ Մոսկվայի ակումբներից մեկը, սակայն որոշեցի մնալ Ստավրոպոլում: 15 տարեկանից հանդես եմ եկել երկրամասի առաջնությունում, որտեղ ձեռք եմ բերել մեծահասակ ֆուտբոլիստների հետ խաղալու փորձ:

Ինձ նկատեցին Ստավրոպոլի «Դինամոյի» մարզիչներն ու հրավիրեցին փորձաշրջանի: Նախորդ տարվա ձմեռվանից սկսեցի մարզվել գլխավոր թիմի հետ և փորձ ձեռք բերելուց հետո 17 տարեկանում 3 տարվա պայմանագիր կնքեցի ակումբի հետ: 

Մեծահասակների ֆուտբոլում կարիերաս վատ չի ընթանում: Ուրախ եմ, որ ինձ տեղ է վստահվել թիմի մեկնարկային կազմում: Ընթացիկ մրցաշրջանում «Դինամոյի» կազմում ПФЛ-ում մասնակցել եմ 10 հանդիպման: Մարզիչները գոհ են իմ խաղից, սակայն ես գիտեմ, որ իմ ներկայիս խաղը հեռու է իմ հնարավորությունների առավելագույն սահմանից:

Հայաստանից ինձ հետ կապ չեն հաստատել, պատանեկան հավաքականներից հրավեր չեմ ստացել, սակայն նման հնարավորություն ստանալու դեպքում ես, միանշանակ, կհամաձայնեմ: Իմ պատմական հայրենիքի հավաքականում հանդես գալը մեծ պատիվ կլինի ինձ համար»,- նշել է Վիկտոր Ավետիքովը:

Սամվել Սուքիասյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.