«Բացահայտելով տաղանդների». Հայ վինգերը Դանիայից (ֆոտո)

NEWS.am Sport-ը շարունակում է ներկայացնել արտերկրում հանդես եկող պատանի հայ ֆուտբոլիստների, որոնք ցանկանում են ապագայում ներկայացնել Հայաստանի ազգային հավաքականը։

Դանիական FC Fredericia ակումբի Մ-19 տարեկանների պատանեկան թիմում հանդես է գալիս 17-ամյա հայ վինգեր Հենրի Մարգարյանը:

«Հենրին ծնվել է 2002 թվականի մայիսի 31-ին Դանիայում: Հիանալի տիրապետում է հայերենին»,- NEWS.am Sport-ի թղթակցի հետ զրույցում պատմել է ֆուտբոլիստի հայրը՝ Աշոտ Մարգարյանը:

«Իմ որդին ֆուտբոլով զբաղվում է 6 տարեկանից: Հանդես է գալիս աջ կիսապաշտպանի դիրքում, երբեմն խաղում է նաև պաշտպանության աջ եզրում:

2008 թվականից Հենրին հանդես է գալիս Դանիայի առաջին դիվիզիոնը ներկայացնող FC Fredericia-ի ակադեմիայում: Եղել է Մ-14 և Մ-15 տարեկանների թիմերի ավագը:

2018 թվականի ամառային արձակուրդների ընթացքում իմ որդին փորձաշրջան է անցել Երևանի «Արցախում» («Նոայում»), նրան օգնել է Ռոբերտ Արզումանյանը, որն այդ ժամանակ նույնպես մարզվում էր «Արցախի» կազմում:

Նույն տարում Հենրին խաղացել է KUFM-ի մեծահասակների թիմում: Դա Ֆրեդերիցիա քաղաքի երկրորդ թիմն է: Այժմ որդիս ներկայացնում է FC Fredericia-ի Մ-19 տարեկանների պատանեկան թիմը:

Հենրին դեռ հրավեր չի ստացել Հայաստանի պատանեկան հավաքականներից, սակայն հրավերի դեպքում մեծ հաճույքով կմիանա մեր հայրենիքի թիմին»,- նշել է Աշոտ Մարգարյանը:

Սամվել Սուքիասյան