Զինեդին Զիդան. Ֆրանսիայի հավաքականը մեծ ապագա ունի

Ես մեծ ապագա եմ տեսնում Ֆրանսիայի հավաքականի համար, հայտարարել է 1998թ. աշխարհի չեմպիոն, 2000թ. Եվրոպայի չեմպիոն Զինեդին Զիդանը France Football-ին տված հարցազրույցում։

«Ես ուշադիր դիտել եմ Ֆինլանդիայի հետ աշխարհի առաջնության ընտրական առաջին հանդիպումը։ Ինձ ուրախացրեց, որ մենք հաղթեցինք արտագնա խաղում։ Թիմի գլխավոր մարզիչ Դիդյե Դեշամին ժամանակ է պետք տալ։ Ես լավ գիտեմ նրա աշխատաոճը եւ վստահ եմ, որ նա կարող է արդյունքի հասնել այս թիմի հետ։

Ինչ վերաբերում է մամուլի քննադատությանը Բենզեմայի խաղին, ապա ես համաձայն չեմ։ Բենզեման դեռ չի խփել մրցաշրջանի իր առաջին գնդակը ոչ «Ռեալում», ոչ ազգային թիմում, բայց մրցաշրջանը նոր է մեկնարկել։ Բոլորը գիտեն, որ նա մեծ խաղացող է, եւ ես վստահ եմ, որ նա մոտ ապագայում կդրսեւորի իր ամբողջ ներուժը եւ Մադրիդում, եւ ազգային թիմում»,- ասել է Զիդանը։