«Բացահայտելով տաղանդների». Հայ կիսապաշտպանը Լեհաստանից (ֆոտո)
10:10 6 մայիսի, 2020NEWS.am Sport-ը շարունակում է ներկայացնել արտերկրում հանդես եկող և Հայաստանի հավաքականում խաղալու երազանք ունեցող պատանի հայ ֆուտբոլիստների:
Լեհական Olimpia Grudziadz ակումբում հանդես է գալիս 17-ամյա կենտրոնական կիսապաշտպան Վահե Մնացականյանը:
«Ծնվել եմ Լեհաստանում, սակայն լավ եմ տիրապետում հայերենին»,- նշել է ֆուտբոլիստը NEWS.am Sport-ի թղթակցի հետ զրույցում:
«Ես դեռ նոր եմ մտել «մեծահասակների ֆուտբոլ» և շատ բան ունեմ սովորելու: Հանդես եմ եկել LKS Lodz-ի Մ-19 տարեկանների պատանեկան թիմում, որտեղից նախորդ տարվա փետրվարին տեղափոխվել եմ Olimpia Grudziadz, որի կազմում դուրս եմ եկել Լեհաստանի առաջնության Առաջին խումբ:
Olimpia Grudziadz-ում հարմարվելու հարցում ինձ շատ է օգնել Հայաստանի երիտասարդական հավաքականի նախկին կիսապաշտպան Աղվան Պապիկյանը: Հրաշալի հարաբերություններ ունեմ Աղվանի հետ, նա ինձ համար մեծ եղբոր պես է:
2019 թվականի օգոստոսին վարձակալությամբ տեղափոխվեցի երրորդ խմբում հանդես եկող Ruch Wysokie Mazowieckie ակումբ, որի կազմում ավելի շատ խաղաժամանակ էի ստանում: Անցկացրեցի 9 հանդիպում: Հիմա վերադառնում եմ իմ ակումբ՝ Olimpia Grudziadz, որի հետ դեռ 1 տարվա գործող պայմանագիր ունեմ: Լեհաստանի առաջնությունում ֆիզիկական պայքարը շատ է:
Հայաստանի ֆուտբոլի ֆեդերացիայի ներկայացուցիչները կապի մեջ են ինձ և Աղվանի եղբոր՝ Վոլոդյա Պապիկյանի հետ: Ես համագործակցում եմ Վոլոդյայի հետ: Սպասվում է, որ ես կհրավիրվեմ Հայաստանի պատանեկան հավաքականի առաջիկա հավաքին: Իմ հայրենիքի պատիվը պաշտպանելը մեծ հպարտություն է ինձ համար, միշտ պատրաստ եմ: Կարծում եմ, որ սեփական երկրի հավաքականի խաղաշապիկը կրելը յուրաքանչյուր ֆուտբոլիստի երազանքն է: Մշտապես հետևում եմ հայկական ֆուտբոլին»,- նշել է Վահե Մնացականյանը:
Սամվել Սուքիասյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.