«Բացահայտելով տաղանդների». Հայ վինգերը շվեդական ԱԻԿ-ից (ֆոտո)

NEWS.am Sport-ը շարունակում է ներկայացնել արտերկրում հանդես եկող և Հայաստանի հավաքականում խաղալու երազանք ունեցող պատանի հայ ֆուտբոլիստների:

Շվեդական ԱԻԿ-ի Մ-17 տարեկանների պատանեկան թիմում հանդես է գալիս 16-ամյա հայ վինգեր Հովիգ Դոուլաջյանը:

«Ծնվել եմ Շվեդիայում, ֆուտբոլով սկսել եմ զբաղվել մոտավորապես 4 տարեկանից:»,- NEWS.am Sport-ի հետ զրույցում նշել է ֆուտբոլիստը:

«Իմ առաջին ակումբը եղել է Märsta IK-ը, որտեղ խաղացել եմ մինչև 13 տարեկանը: Այնուհետև փորձաշրջան եմ անցել ԱԻԿ-ում և ընդունվել Շվեդիայի լավագույն ակումբներից մեկի ակադեմիան: ԱԻԿ-ի պատանեկան թիմերում հանդես եմ գալիս արդեն 3 տարի: Այս պահին խաղում եմ Շվեդիայի Մ-17 տարեկանների պատանեկան առաջնության Բարձրագույն խմբում:

Հանդես եմ գալիս աջ վինգերի դիրքում: Իմ գլխավոր նպատակը ԱԻԿ-ի հետ պրոֆեսիոնալ պայմանագիր կնքելն ու հիմնական թիմի կազմը համալրելն է:

Նախորդ տարի մենք մասնակցեցինք Gothia Youth Cup մրցաշարին, որտեղ մրցեցինք Բրազիլիան, Դանիան և այլ երկրներ ներկայացնող թիմերի հետ:

Ինձ հետ կապ են հաստատել Հայաստանի ֆուտբոլի ֆեդերացիայի ներկայացուցիչները: Պայմանավորվել ենք, որ մոտ ապագայում հրավիրվելու եմ Հայաստանի Մ-17 տարեկանների պատանեկան հավաքական: Դա մեծ պատիվ կլինի ինձ համար: Ես լավ չեմ խոսում հայերեն, բայց հասկանում եմ գրեթե ամեն ինչ (ժպտում է):

Իմ մայրը՝ Մարալը, ծնվել է Շվեդիայում, իսկ հայրս՝ Աբրահամ Դոուլաջյանը, Սիրիայից է: Նա Ստոկհոլմ է տեղափոխվել 1999 թվականին: Իմ հայրը նույնպես եղել է պրոֆեսիոնալ ֆուտբոլիստ, խաղացել է Հալեպի «Հոմենթմենում», ինչպես նաև` Լիբանանի և Շվեդիայի առաջնություններում»,- նշել է Հովիգ Դոուլաջյանը:

Սամվել Սուքիասյան