«Բացահայտելով տաղանդների». Բալայան եղբայրները՝ Բելգիայից (ֆոտո)

11:11   1 մայիսի, 2020

NEWS.am Sport-ը շարունակում է ներկայացնել արտերկրում հանդես եկող և Հայաստանի հավաքականում խաղալու երազանք ունեցող պատանի հայ ֆուտբոլիստների:

Բելգիայում հանդես են գալիս Բալայան եղբայրները՝ Էդիկը, Էմիլն ու Արթուրը:

Էդիկ Բալայանը ծնվել է 2000 թվականի սեպտեմբերին Մեխելենում: Խաղում է կենտրոնական հարձակվողի դիրքում, նաև հարձակման եզրերում:

Ֆուտբոլով սկսել է զբաղվել 5 տարեկանից K.R.C Mechelen դպրոցում: 2015 թվականին տեղափոխվել է KSK Heist, որտեղ մինչև 2017 թվականը խաղացել է Մ-15 և Մ-16 տարեկանների թիմերում:

2017 թվականին Էդիկը տեղափոխվել է Մ-17 տարեկանների Elite դիվիզիոնը ներկայացնող Royale Union Saint-Gilloise ակումբ: Նույն տարում նա հրավիրվել է Հայաստանի Մ-18 տարեկանների պատանեկան հավաքական՝ մասնակցելու Բելառուսի հետ ընկերական հանդիպումների: Իր խոսքով՝ հավաքականից հրավեր ստանալը հպարտության մեծ առիթ էր ամբողջ ընտանիքի համար:

2018 թվականին Էդիկը տեղափոխվել է Beerschot Wilrijk, մարզվել ու խաղացել է երկրորդ թիմի կազմում, այնուհետև 2 անգամ հրավեր է ստացել Հայաստանի Մ-19 տարեկանների պատանեկան հավաքականից, սակայն վնասվածքների պատճառով չի կարողացել միանալ թիմին՝ բաց թողնելով նաև Երևանում անցկացված Եվրոպայի Մ-19 տարեկանների առաջնության եզրափակիչ փուլը: Էդիկն այդ օրերին գտնվել է հայրենիքում և աջակցել հավաքականում իր խաղընկերներին:

Այժմ Էդիկը նոր ակումբ է փնտրում և պատասխանի է սպասում մի քանի թիմերից, որոնց կազմում փորձաշրջան է անցել: Կորոնավիրուսի պանդեմիայի պատճառով ստեղծված իրավիճակում նա մարզավիճակը պահպանում է տնային մարզումների շնորհիվ:

Էդիկի կրտսեր եղբայրները նույնպես զբաղվում են ֆուտբոլով: 12-ամյա հարձակվող Էմիլ Բալայանը 5 տարեկանից հանդես է գալիս K.R.C Mechelen-ում, իսկ 18-ամյա կիսապաշտպան Արթուր Բալայանը ներկայացնում է FC Duffel-ը:

Սամվել Սուքիասյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.