«Բացահայտելով տաղանդների»․ Հայ պաշտպանը՝ Բելգիայից (ֆոտո)

11:11   26 ապրիլի, 2020

NEWS.am Sport-ը շարունակում է ներկայացնել արտերկրում հանդես եկող և Հայաստանի հավաքականում խաղալու երազանք ունեցող պատանի հայ ֆուտբոլիստների:

Բելգիական ASV Geel ակումբի մինչեւ 15 տարեկանների թիմում հանդես է գալիս 14-ամյա պաշտպան Սարգիս Գաբոյանը։

«Սարգիսը ֆուտբոլով զբաղվում է 6 տարեկանից»,- NEWS.am Sport-ի թղթակցի հետ զրույցում նշեց ֆուտբոլիստի հայրը՝ Հրաչ Գաբոյանը։

«Որդիս հանդես է գալիս հիմնականում աջ պաշտպանի դիրքում, բայց որոշ մարզիչներ նրան փորձել են նաեւ «8 համարի» դիրքում (կենտրոնական կիսապաշտպան - խմբ․)։

2016-2017 թվականներին որդիս խաղացել է KFC Duffel-ի պատանեկան թիմում, հետո տեղափոխվել է Lierse SK։

2019 թվականից նա ներկայացնում է բելգիական IP լիգայի ASV Geel-ը։ Բելգիայի պատանեկան առաջնությունը տարբերվում է այլ երկրների առաջնություններից, սպեցիֆիկ եւ բարձր մրցակցությամբ մրցաշար է։

Սարգիսը պարբերաբար մարզումներ է անցկացնում հոլանդական ՊՍՎ-ի ակադեմիայում։ Նախնական պայմանավորվածության համաձայն, սեպտեմբերին նա փորձաշրջան կանցնի ֆրանսիական «Լիոնում»։

Կապ ենք պահում «Շիրակի» մարզիչ Ֆելիքս Խոջոյանի, նաեւ Գյումրիի ակումբի նախկին խաղացող Արա Ադամյանի հետ, որն այժմ աշխատում է Ֆրանսիայում։

Հպարտ ու երջանիկ կլինենք, եթե Սարգիսը հրավեր ստանա Հայաստանի պատանեկան հավաքականից։ Նա կանի հնարավոր ամեն ինչ, որպեսզի լավագույն կողմերից դրսեւորվի եւ օգնի հայրենիքին»,- նշեց Հրաչ Գաբոյանը։

Սամվել Սուքիասյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.