Վահան Բիչախչյանը՝ Սլովակիայում իր կարիերայի, կորոնավիրուսի, հավաքականի և Կապարոսի մասին (ֆոտո)
11:18 15 ապրիլի, 20202017 թվականի ամռանը հայկական ֆուտբոլի ամենատաղանդավոր ֆուտբոլիստներից մեկը՝ Վահան Բիչախչյանը, Գյումրու «Շիրակից» տեղափոխվեց Սլովակիան ներկայացնող «Ժիլինա»:
Վնասվածքների պատճառով Հայաստանի երիտասարդական հավաքականի կիսապաշտպանին դեռ չի հաջողվել լիովին դրսևորել իրեն Սլովակիայում: «Ժիլինայի» երկրորդ թիմի կազմում անցկացրած 34 խաղում Բիչախչյանը դարձել է 11 գոլի ու 4 գոլային փոխանցման հեղինակ, իսկ հիմնական թիմի կազմում 21 խաղում հայ կիսապաշտպանը կատարել է 2 արդյունավետ փոխանցում:
NEWS.am Sport-ի թղթակցի հետ զրույցում Բիչախչյանը պատմել է՝ ինչպես է պահպանում մարզավիճակը կորոնավիրուսի պանդեմիայով պայմանավորված դադարի ընթացքում, հերքել ֆինանսական խնդիրների պատճառով «Ժիլինայի» լուծարման մասին լուրերը: Վահանը խոսել է ակումբում և ազգային հավաքականում իր նպատակների մասին, նաև կարծիք հայտնել Հայաստանի հավաքականի նորանշանակ գլխավոր մարզիչ Խոակին Կապարոսի մասին:
ՖՈւՏԲՈԼ VS ԿՈՐՈՆԱՎԻՐՈւՍ
«Կարանտինի ընթացքում հիմնականում գտնվում եմ տանը: Ամեն շաբաթ ակումբից անհատական մարզման ծրագիր եմ ստանում: Փորձում եմ հնարավորինս արդյունավետ օգտագործել պարտադրված դադարը, որպեսզի պահպանեմ մարզավիճակս»:
««ԺԻԼԻՆԱՅԻ» ԼՈւԾԱՐՄԱՆ ՄԱՍԻՆ ԼՈւՐԵՐԸ ՉԵՆ ՀԱՄԱՊԱՏԱՍԽԱՆՈւՄ ԻՐԱԿԱՆՈւԹՅԱՆԸ»
«Շշուկներ են տարածվել այն մասին, որ «Ժիլինան» գտնում է լուծարման եզրին: Դա չի համապատասխանում իրականությանը: Հուսով եմ՝ վիրուսը շուտով կնահանջի, և մենք կկարողանանք վերսկսել մարզումները: Իմ բոլոր մտքերը կապված են «Ժիլինայի» հետ, որի հետ ունեմ գործող պայմանագիր»:
«ՎՆԱՍՎԱԾՔՆԵՐԸ ԽԱՆԳԱՐԵՑԻՆ, ՍԱԿԱՅՆ ՊԵՏՔ Է ԱՌԱՋ ՇԱՐԺՎԵԼ»
«Սլովակիայում առաջին փուլը շատ դժվար անցավ: Ես նոր էի ապաքինվել վնասվածքից, երբ կրկին վնասվածք ստացա ու երկար ժամանակով դուրս մնացի շարքից: Սակայն, ոչ մի ֆուտբոլիստ ապահավոգրված չէ վնասվածքներից: Պետք է առաջ շարժվել և պայքարել մեկնարկային կազմում տեղի համար: Նույնիսկ նման իրավիճակներից կարող ես օգուտ քաղել ապագայի համար»:
ՀԱՅԱՍՏԱՆԻ ՀԱՎԱՔԱԿԱՆԻ ԵՎ ԿԱՊԱՐՈՍԻ ՄԱՍԻՆ
«Ցանկացած ֆուտբոլիստի երազանքն է սեփական երկրի ազգային հավաքականում հանդես գալը: Դրա համար պետք է շատ աշխատել:
Շատ եմ լսել Խոակին Կապարոսի մասին, որը մարզել է «Սևիլիայի» և «Աթլետիկ Բիլբաոյի» պես թիմեր: Հուսով եմ, որ նա կօգնի հավաքականին հաջողության հասնել և ամենակարևորը՝ ուրախացնել մեր ազգին»:
Սամվել Սուքիասյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.