18:39 25 մարտի, 2020Կորոնավիրուս vs սպորտ շարքի հերթական մասնակիցը գրոսմայստեր, Հայաստանի քառակի չեմպիոն Մարիա Գեւորգյանն է:
Կորոնավիրուս vs մարզումներ
Շախմատի տունը փակ է, այնտեղ չենք մարզվում, այստեղ արդեն խնդիր ենք ունենում միասին մարզվելու: Խուսափում ենք շփումներից: Կորոնավիրուսի պատճառով բազմաթիվ միջազգային մրցաշարեր են չեղարկվել եւ այս շրջանում որոշակի անորոշություն է, քանի որ չգիտենք՝ ինչ մրցաշարի պետք է պատրաստվենք: Իսկ երբ չգիտես՝ առաջիկայում ինչ մրցաշարեր ունես, դժվար է մարզվելը, մոտիվացիա չկա: Իսկ ավելի հստակ կարելի ասել, որ 2020-ը չեղարկվել է։
Փորձում ենք մարզավիճակ պահել, խնդիրներ ենք ուղարկում միմյանց, հեռավար մարզվել: Իմ անունից միայն կարող եմ ասել. օնլայն հարթակում ես չեմ կարողանում մարզվել, ինձ համար բարդ է: Նախընտրում եմ ինքս ինձ համար տանը խնդիրներ լուծել, քան օնլայն մարզումներ անել:
Կորոնավիրուս vs Համաշխարհային Օլիմպիադա
Համաշխարհային օլիմպիադայի նախապատրաստական փուլը մեզ մոտ դեռ չէր սկսվել, այս առումով չեն տուժել մեր մարզումները: Մինչեւ Օլիմպիադան նախատեսված էին մի շարք մրցաշարեր եւ հավաքներ: Բայց այս պահին մրցաշարերը չեղարկված են: Ինչ վերաբերում է հավաքներին, դրանք նույնպես: Մայիսին պետք է ունենայինք հավաք:
ՖԻԴԵ-ն պաշտոնական մրցաշարերից միայն հավակնքրդների մրցաշարը անցկացրեց: Հունիսի 1-ին Ռումինիայում պետք է մեկնարկեր կանանց Եվրոպայի առաջնությունը: Եվ, քանի որ ՖԻԴԵ-ն արդեն հետաձգել է տղամարդկաց Եվրոպայի առաջնությունը և Օլիմպիադան, սպասում ենք կանանց առաջնության օրերին։ Այսինքն՝ ամեն ինչ անորոշ է: Համաշխարհային օլիմպիադան տեղի կունենա հաջորդ տարի ամռանը։ Այս պահին ընթանում է աշխարհի չեմպիոնի հավակնորդների մրցաշարը, որը ՖԻԴԵ-ն, այնուամենայնիվ, անցկացրեց:
Մասնակիցների անվտանգությունը մաքսիմալ պահպանվում է, իսկ դա նշանակում է՝ շախմատիստներն այլ պայմաններում են խաղում: Շախմատն այն մարզաձեւերից է, որ մրցաշարում սովորական պայմաններից դուրս ես խաղում, ամեն ինչ ավելի է դժվարանում:
Կորոնավիրուս vs Հայկական սպորտ
Շատ բան կախված էր Տոկիո 2020-ից։ Կարծում եմ՝ մեր մարզիկները փորձում են հնարավորինս մարզավիճակ պահպանել, բայց այս իրավիճակում, իրոք, շատ բարդ է, երբ սպասել ես մի մեծ իրադարձության և այն անսպասելի հետաձգվում է։ Օրինակ՝ ես ծրագրում էի Թաիլանդում միջազգային մրցաշարի մասնակցել, մրցաշար կար նաեւ Իսլանդիայում: Այս եւ շատ այլ մեծ միջազգային մրցաշարեր չեղարկվել են: Փորձում ենք պահպանել բոլոր կանոնները, մարզվել, խուճապի չմատնվել: Համոզված եմ՝ հայ մարզիկների մոտ մոտիվացիան այնքան շատ է, որ այս իրավիճակը շատ բան չի փոխի:
Կորոնավիրուս vs Մարիա Գեւորգյան

Ես այժմ ինքնամեկուսացած եմ, հետեւում եմ առողջապահության նախարարության հորդորներին, հնարավորինս փորձում եմ մնալ տանը, բայց դժվար է ստացվում: Երբեմն դուրս եմ գալիս, բայց հնարավորինս զերծ եմ մնում մարդաշատ վայրերից, հյուր գնալուց: Անձնական շփումների ժամանակ պահպանում եմ հեռավորությունը, մշտապես ձեռնոցով, դիմակով, ալկոգելն էլ միշտ ինձ հետ է: Ձեռքով եւ «պաչիկով» չեմ բարեւում: Երբեմն էլ պարզապես մեքենա եմ վարում, որ դուրս գամ ցրվեմ։
Լուսինե Շահբազյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.