Հայկ Մուսախանյանը՝ ԲԱՏԷ-ի նկատմամբ հաղթանակի, կորոնավիրուսի, Խոակին Կապարոսի և Հայաստանի հավաքականի մասին
11:17 24 մարտի, 2020Բելառուսի առաջնության մեկնարկային տուրում «Էներգետիկ-ԲԳՈՒ»-ն տնային խաղում անսպասելի հաղթանակ տարավ ԲԱՏԷ-ի նկատմամբ` 3:1:
Տանտերերի կազմում խաղադաշտում 73 րոպե անցկացրեց հայ կիսապաշտպան Հայկ Մուսախանյանը, որը մասնակցեց իր թիմի երկրորդ գոլային գրոհին:
NEWS.am Sport-ի թղթակցի հետ զրույցում 22-ամյա կիսապաշտպանը խոսել է ակումբային կարիերայի, Բելառուսում կորոնավիրուսի տարածման, Հայաստանի հավաքականից հրավեր ստանալու մեծ ցանկության և հավաքականի գլխավոր մարզիչի պաշտոնում Խոակին Կապարոսի նշանակման մասին:
ԱԿՈւՄԲԱՅԻՆ ԿԱՐԻԵՐԱՅԻ ՄԱՍԻՆ
«Այս թիմում ինձ շատ լավ եմ զգում: «Էներգետիկում» սա իմ երրորդ մրցաշրջանն է: Այստեղ մթնոլորտը դրական է, մենք լավ աշխատանք ենք կատարել նախամրցաշրջանային հատվածում:
Մրցաշրջանը դեռ նոր է սկսել, և, իհարկե, շատ հաճելի է մեկնարկել ԲԱՏԷ-ի պես թիմին հաղթելով: Մենք շատ լավ տրամադրվեցինք հանդիպմանը և հասանք ցանկալի արդյունքի»:
ՖՈւՏԲՈԼ ԵՎ ԿՈՐՈՆԱՎԻՐՈւՍ
«Այո, մենք հետևում ենք նորություններին, սակայն փորձում ենք կենտրոնանալ խաղերի վրա: Բելառուսում հանդիպումներին ներկա են երկրպագուներ, չկա ոչ մի սահմանափակում: Ամեն ինչ հրաշալի է, Բելառուսում սիրում են ֆուտբոլ»:
ՀԱՅԱՍՏԱՆԻ ՀԱՎԱՔԱԿԱՆԻ ԵՎ ԽՈԱԿԻՆ ԿԱՊԱՐՈՍԻ ՄԱՍԻՆ
«Հետևում եմ հայկական ֆուտբոլին: Խոակին Կապարոսի նշանակումը միայն դրական է Հայաստանի հավաքականի համար: Կապարոսը անվանի և էմոցիոնալ մասնագետ է՝ տարբերվող ֆուտբոլային փիլիսոփայությամբ:
Իհարկե, մեծ ցանկություն ունեմ հրավեր ստանալ Հայաստանի ազգային հավաքականից, սակայն ամեն ինչ չէ, որ կախված է ինձանից: Ակումբում պետք է ինձ դրսևորեմ լավագույն կողմերով: Կարծում եմ, որ հավաքականին պետք կգամ հենակետային գոտում»:
Սամվել Սուքիասյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.