Կորոնավիրուս vs սպորտ․ Տոկիո-2020-ի ուղեգիր նվաճած Արթուր Դավթյան

22:54   22 մարտի, 2020

Կորոնավիրուս vs սպորտ շարքի երկրորդ մասնակիցը Եվրոպական խաղերի չեմպիոն, սպորտային մարմնամարզության Հայաստանի հավաքականում հենացատկի վարժության առաջատար Արթուր Դավթյանն է:  

2019 թվականի հոկտեմբերի 8-ին Շտուտգարտում տեղի ունեցած աշխարհի առաջնությունում Արթուր Դավթյանը նվաճեց անվանական օլիմպիական ուղեգիր: Նա  սպորտային մարմնամարզությունում Հայաստանի միակ ներկայացուցիչը կլինի Տոկիո-2020-ում:

Կորոնավիրուսի պանդեմիայի տարածման կանխարգելման նպատակներով այս շրջանում դադարեցված են նաեւ Արթուր Դավթյանի եւ ամբողջ հավաքականի մարզումները, որոնք հիմնականում կենտրոնացված են Ալբերտ Ազարյանի անվան մարզադպրոցում: Արտակարգ դրության պայմաններում, մարզիչներն ու մարզիկները, նաեւ եռակի օլիմպիական չեմպիոն Ալբերտ Ազարյանը փակել են մարզադահլիճի դռներն ու գնացել տուն:

Կորոնավիրուս vs մարզումներ

Կորոնավիրուսի պատճառով տանն եմ մարզվում: Փորձում եմ ֆիզիկական վարժություններ անել, բայց դա չի կարելի համարել մարզվել: Մեր մարզաձեւն այն տեսակներից է, որ պետք է գործիքների վրա մարզվես: Եթե չկա գործիք ձեռքիդ տակ, մենք չունենք վարժություններ, որոնք կփոխարինեն գործիքներին: Ըմբիշները, բռնցքամարտիկները կարող են դուրսը վազել, կամ դրսում ինչ-որ տանձիկ լինի, խփեն, կամ զույգ ունենան, սփարինգ անեն: Մենք չունենք այս հնարավորությունները, այս առումով մեզ համար շատ վատ է:

Հնարավորինս փորձում եմ տանը ուժային վարժություններ անել, բայց համարում եմ, որ ես չեմ մարզվում եւ մեկ ամիս հետ ընկա իմ մարզումային ծրագրից: Շատ դժվար է նաեւ տանը մարզվել, բայց բոլորս էլ հասկանում ենք, որ սա ժամանակավոր է եւ պետք է համբերենք:

Վրաստանում մարտի 1-14-ը հավաք ունեցանք, այնտեղից վերադարձանք մի քանի օր դահլիճում մարզվեցինք եւ մեզ ուղարկեցին տուն:

Կորոնավիրուս vs Տոկիո-2020

Եթե մեկ ամիս էլ այս վիճակը շարունակվի, Տոկիո-2020-ը կհետաձգեն, իմ կարծիքով: Այսպես վստահ չի լինի: Շատ մարզաձեւերում շատ մարզիկներ դեռ ուղեգիր չեն նվաճել: Իսկ այս կարգավիճակում ուղղակի հնարավոր չէ Օլիմպիական խաղերին մոտենալ կատարյալ մարզավիճակով: Ինչպե՞ս են մարզիկները հասցնելու ուղեգիր վերցնելու համար պատրաստվել, ապա վերականգնվել եւ Օլիմպիական խաղերին մասնակցել:

Յուրաքանչյուր մարզիկի համար մեկ ամիս չմարզվելը շատ վատ է. դա նշանակում է աշխատանքիդ մեծ մասը ջուրը գցել: Սպորտային մարմնամարզությունում ավելի բարդ է: Եթե, օրինակ, եւս մեկ ամիս տեւի արտակարգ դրությունը, հնարավորություն չունենանք մարզվել, հետո պարզվի, որ Օլիմպիական խաղերը չեն հետաձգվում, պետք է մասնակցենք, ես ուղղակի չեմ մեկնի Տոկիո: Առանց մարզվելու, առանց համապատասխան մարզավիճակ հավաքելու չեմ գնա Օլիմպիական խաղեր:

Ծայրահեղ իրավիճակում եթե երկու ամիս ժամանակ ունենամ Օլիմպիական խաղերից առաջ, ես կհասցնեմ գալ իմ մարզավիճակի գագաթնակետին, բայց շատ մարզաձեւերում գուցե մարզիկները չհասցնեն լավ մարզավիճակ ձեռք բերել: Միեւնույն է, այդ մեկ ամիսն էլ Տոկիո-2020-ից առաջ հետ է գցում մեզ մեր նախապատրաստական փուլից, կրկնակի լարվածություն է առաջացնում: Ես անպատրաստ, առանց նորմալ մարզվելու չեմ մասնակցի Օլիմպիական խաղերին, քանի որ մեր մարզաձեւը շատ բարդ է եւ կարող ես ուղղակի ոչ թե վատ ցատկել, այլ գլխի վրա ընկնել ու շատ լուրջ վնասվածք ստանալ:

Բացի մարզիկների մարզավիճակ ձեռք բերելը, Տոկիո-2020-ը հետաձգելու հետ կապված շատ այլ խնդիրներ էլ կան: Օրինակ՝ եթե հետաձգեցին, մենք, ուղեգիր ունեցող մարզիկներս, նորի՞ց պետք է վարկանիշ անենք, թե՞ մեր նվաճած վարկանիշներով կարող ենք մասնակցել: Ես, օրինակ արդեն ունեմ վարկանիշ եւ անարդար կլինի, եթե նորից պայքարեմ ուղեգրի համար:

Այս պահին ոչ ոք չի կարող կանխատեսել․ կհետաձվգե՞ն Խաղերը, թե՞ ոչ: Ամեն դեպքում ես որպես մարզիկ, չեմ պատկերացնում Օլիմպիական խաղերն առանց հանդիսականի: Չի կարող այդպես լինել՝ 4 տարի սպասես ամենագլխավոր մարզական իրադարձությանը, մասնակցության իրավունք ձեռք բերես, գնաս հասնես այնտեղ ու ոչ ոք մարզադահլիճում քեզ չհետեւի, չերկրպագի, չծափահարի քո լավ ցատկի համար: Օլիմպիական խաղերն առանց հանդիսատեսի, կնմանվի Հայաստանի առաջնության, ուղղակի ավելի լավ դահլիճում:

Կորոնավիրուս vs հայկական սպորտ

Առհասարակ համաշխարհային սպորտի վրա այս պանդեմիան մեծ հետք կթողնի: Վերջերս բռնցքամարտի վարկանիշային մրցաշարին էի հետեւում, որտեղ նաեւ մեր հավաքականն էր մասնակցում: Մեր մարզիկներից մեկին հաջողվեց ուղեգիր վերցնել, նա մարզվել էր, պատրաստվել էր եւ կարողացավ նվաճել ուղեգիր: Երկու օր անց  մրցաշարը դադարեցրին: Մեր մյուս մարզիկները, որոնք երկար մարզումային փուլ էին անցել, մարզավիճակի եկել, քաշը կարգավորել, հասել Լոնդոն եւ մեկ օրից պետք է դուրս գային ռինգ, մրցաշարը դադարեցրին: Հոգեբանական առումով սա յուրաքանչյուր մարզիկի համար մեծ սթրես է: Ստացվում է՝ մարզիկը պետք է մարզավիճակից դուրս գա, դեռ չգիտի՝ երբ պետք է լինի մրցաշարը, նորից մարզավիճակ հավաքի: Այս ամենն ազդում է մարզիկի հոգեբանության վրա:

Այս պանդեմիան բոլոր մարզաձեւերի, առհասարակ, բոլոր ոլորտների վրա կազդի:

Կորոնավիրուս vs Արթուր Դավթյան

Հիմնականում տանն եմ լինում այս շրջանում: Աշխատում եմ դուրս չգալ: Դիմակ դնում եմ հիմնականում այն ժամանակ, երբ մարդաշատ վայրերում պետք է լինեմ: Հանգստանում ենք:

Խորհուրդ կտամ մարդկանց, հանրությանը խուճապի չմատնվել: Երբ մենք Վրաստանի հավաքից վերադառնում էինք, արդեն հայտարարվել էր, որ երկրի սահմանները փակվում են: Այնտեղ այդքան էլ մեծ չէր խուճապը: Սա էլ սովորական վիրուս է, որի թիրախում թոքերն են: Պետք է ինքնաբուժությամբ չզբաղվել եւ առաջին իսկ ախտանշանների կամ ջերմության դեպքում դիմել բժշկի: Ամեն ինչ լավ կավարտվի, Օլիմպիական խաղերը եւս:

Լուսինե Շահբազյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.