Երկորդ հաղթանակը Լոնդոնի վարկանիշային մրցաշարում

Բռնցքամարտի Լոնդոնի օլիմպիական վարկանիշային մրցաշարում հաղթանակով մեկնարկեց նաև 81 կգ քաշային Գոռ Ներսիսյանը։

Եվրոպական խաղերի բրոնզե մեդալակիրը համոզիչ առավելությամբ հաղթանակ տարավ չեխ Կարել Հորեսեկի նկատմամբ։ Ընդ որում երկրորդ ռաունդում Հայաստանի ներկայացուցիչը մրցակցին նոկդաունի ենթարկեց։ Երրորդ ռաունդում Գոռը վնասվածք ստացավ և մրցավարները դադարեցրին մենամարտը, բայց քանի որ հայ մարզիկը միավորներով զգալի առաջ էր՝ հաղթանակը շնորհվեց նրան։

Ուշ երեկոյան հայ մարզիկներից ռինգ դուրս կգան նաև 91 կգ քաշային Նարեկ Մանասյանն ու 69 կգ քաշային Անի Հովսեփյանը։

Հիշեցնենք, որ Լոնդոնում Հայաստանի հավաքականից առաջինը պայքարի մեջ էր մտել 57 կգ քաշային Արթուր Բազեյանը՝ հաղթելով Լեհաստանը ներկայացնող Մացեյ Յոզվիկին։