Հայ մարզուհին՝ Եվրոպայի չեմպիոն

23:24   6 սեպտեմբերի, 2012

Ռուսաստանում ավարտվեց ունիվերսալ մարտերի 18-ից 20 տարեկանների Եվրոպայի առաջնությունը։ Գերազանց ելույթ ունեցավ  Հայաստանի միակ ներկայացուցիչ, 70 կիլոգրամ քաշային Աննա Բադալյանը, ով Եվրոպայի չեմպիոնուհի հռչակվեց նախ «Թեթեւ ունիվերսալ մարտ» կարգում, ապա՝ «Ունիվերսալ մարտ» կարգում, հաղորդում են Հայաստանի ունիմարտի ֆեդերացիայից։

«Ունիվերսալ մարտերը» մի քանի մարզաձեւի համադրում է՝ արգելքների գոտու հաղթահարում, դանակի նետում, օդամղիչ ատրճանակից հրաձգություն եւ ձեռնամարտ: Թեեւ այն նոր մարզաձեւ է, սակայն տարեց տարի՝ ընդլայնելով աշխարհագրությունը, մեծ տարածում է գտնում: Այս առաջնությունում բոլորից շատ մեդալ է  նվաճել Ռուսաստանի հավաքականը. 23 ոսկի, 21 արծաթ, 32 բրոնզ, երկրորդն ուկրաինացիներն են՝ 5 ոսկի, 6 արծաթ, 4 բրոնզ:

Գոյություն ունի նաեւ «Ձմեռային ունիվերսալ մարտեր» մարզաձեւը, ուր ներառված է նաեւ դահուկավազք, իսկ ձեռնամարտն անցկացվում է ձյան վրա:

«Ձմեռային ունիվերսալ մարտերն» ընդգրկված են 2014թ. Սոչիի ձմեռային Օլիմպիական խաղերի ցուցադրական ելույթներում։

Ունիմարտ մարզաձեւն ունի ռազմակիրառական նշանակություն եւ ֆեդերացիաներ կան արդեն ավելի քան երեք տասնյակ երկրում: Հայաստանի «Ունիվերսալ մարտերի» ֆեդերացիան գործում է երկրորդ տարին: Այն ստեղծվել է Հայաստանի սամբոյի ֆեդերացիայի նախաձեռնությամբ եւ գործում է հայ սամբիստների բազայի վրա: Առհասարակ, ունիմարտի մրցումներին մասնակցում են մենապայքարային ձեւերի մարզիկներ, հիմնականում՝ սամբիստներ եւ ձյուդոիստներ ու Հայաստանն էլ բացառություն չէ:

Լուսանկարում՝ Աննա Բադալյանը եւ Հայաստանի Ունիմարտի ֆեդերացիայի նախագահ Լեւոն Հայրապետյանը



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։