Արթուր Ալեքսանյան․ Մարզիկների համար մեծ մոտիվացիա է, երբ զգում ես երկրիդ ուշադրությունը

15:11   21 փետրվարի, 2020

Վարչապետի հայտարարած 25 օլիմպիական ոսկե մեդալներից մի քանիսը եթե իմը լինի, շատ լավ կլինի: Ամեն ինչ կանեմ՝ երկրորդ ոսկին նվաճելու համար:

Այս մասին լրագրողների հետ զրույցում ասաց օլիմպիական չեմպիոն, աշխարհի եռակի, Եվրոպայի հնգակի եւ Եվրոպական խաղերի չեմպիոն Արթուր Ալեքսանյանը:

«Մարզիկների համար մեծ մոտիվացիա է, երբ զգում ես երկրիդ ուշադրությունը: Հաճելի է եւ պարտավորեցնող: Կփորձենք ավելի մեծ հաջողություններ գրանցել եւ մեր ազգին ուրախացնել:

Չեմ կարող ասել, թե կհաջողվի մեզ 2050 թվականին ունենալ 25 օլիմպիական չեմպիոն, բայց հաստատ երկուսը չենք ունենա: Մեզ ոչինչ չի պակասում այդ արդյունքին հասնելու համար: Զգում ենք պետության ուշադրություն մեր եւ մեր կատարած աշխատանքի հանդեպ:

Այժմ իմ նպատակն ու ցանկությունը Տոկիո-2020-ում կրկնակի օլիմպիական չեմպիոն հռչակվելն է: Ոչինչ չեմ խոստանում, կփորձեմ ամեն ինչ անել, որ նպատակիս հասնեմ: Մոտիվացվում եմ իմ ժողովրդով, բոլոր այն մարդկանցով՝ ծանոթ, անծանոթ, որոնք դրսում հանդիպում, շնորհավորում եւ լավ խոսքեր են ասում»,- ասաց Արթուր Ալեքսանյանը:

Անդրադառնալով 77 կգ քաշային կարգում օլիմպիական մասնակցի շուրջ ստեղծված իրավիճակին, օլիմպիական չեմպիոնն ասաց, որ չի միջամտում մարզիչների որոշմանը:

«77 կգ քաշային կարգում Կարապետ Չալյանին Տոկիոյում հանդես գալու իրավունք տալու որոշումը մարզիչներինն է եւ մարզչական խորհրդինը: Ես մարզիչների որոշումները չեմ քննարկում, այլ կատարում եմ: Թե ով, ինչ գրառում է կատարել, ոչինչ չեմ կարող ասել»,- նշեց Արթուր Ալեքսանյանը:

Փետրվարի 21-ի նախագահական նստավայրում Արթուր Ալեքսանյանը 2019 թվականի լավագույն մարզիկների հետ պարգեւատրվեց: Լավագույն 10-ը մարզիկներին պարգեւատրեց վարչապետ Նիկոլ Փաշինյանը:

Լուսինե Շահբազյան



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։