Ուզում էի ոսկե մեդալ նվաճել, բայց ինչ-որ բան կիսաեզրափակիչում խանգարեց: Այս մասին լրագրողների հետ զրույցում ասաց Եվրոպայի բրոնզե մեդալակիր Կարեն Ասլանյանը:
Հիշեցնենք, որ Իտալիայի մայրաքաղաք Հռոմում տեղի ունեցած հունահռոմեական ըմբշամարտի Եվրոպայի առաջնությունում 67 կգ քաշային կարգում Հայաստանի ներկայացուցիչ Կարեն Ասլանյանը բրոնզե մեդալի համար պայքարում մրցեց Հունգարիայի ներկայացուցիչ Կրիստիան Իստվան Վանզայի հետ եւ հաղթեց 7:5 հաշվով:
«Ընդհանուր թիմի համար շատ լավ անցավ Եվրոպայի առաջնությունը: Կարծում եմ՝ մարզիչները գոհ են մեզանից: Ուզում էի ոսկե մեդալ նվաճել, բայց չեմ կարող ասել, թե ինչն ինձ խանգարեց կիսաեզրափակիչում: Մրցավարական կողմնապահություն չկար, մաքուր էին դատում:
Մարզիչների հետ կքննարկենք՝ որտեղ էր իմ սխալը, որ մյուս անգամ նույնը չանեմ: Կպատրաստվեմ վարկանիշային մրցաշարի: Ամեն ինչ կանեմ, որ նվաճեմ ուղեգիր, ապա օլիմպիական մեդալ»,- ասաց Կարեն Ասլանյանը:
Սա Ալսանյանի երրորդ բրոնզե մեդալն է Եվրոպայի առաջնությունում: Հայ ըմբիշը բրոնզե մեդալակիր է դարձել նաեւ 2018 եւ 2019 թվականներրին:
Ասլանյանը պայքարը սկսել էր որակավորման փուլից, որտեղ 3:1 հաշվով հաղթեց շվեդ Օսկար Էրլանդսոնի, 1/8 եզրափակիչում 9:0 հաշվով վստահ հաղթանակ էր տարել վրացի Գեորգի Շոտաձեի նկատմամբ, քառորդ եզրափակիչում 10:1 հաշվով հաղթել էր սերբ Մատե Նեմեշին: Կիսաեզրափակիչում Կարեն Ասլանյանը գերլարված պայքարում 3:4 հաշվով պարտվեց Ռուսաստանի ներկայացուցիչ Նազիր Աբդուլաեւին:
Լուսինե Շահբազյան
Ֆոտո՝ Արսեն Սարգսյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։