17:07 12 փետրվարի, 2020Բրոնզե մեդալի համար ուրախ չեմ: Կարող էի պայքարել ոսկե մեդալի համար: Իմ սխալի պատճառով պարտվեցի կիսաեզրափակիչում:
Այս մասին NEWS.am Sport-ի թղթակցի հետ զրույցում Հռոմից ասաց Եվրոպայի բրոնզե մեդալակիր, Եվրոպական խաղերի փոխչեմպիոն Կարապետ Չալյանը:
Իտալիայի մայրաքաղաքում ընթացող հունահռոմեական ըմբշամարտի Եվրոպայի առաջնությունում Չալյանը փետրվարի 11-ին նվաճեց բրոնզե մեդալ 77 կգ քաշային կարգոււմ: Բրոնզե մեդալի համար գոտեմարտում գյումրեցի ըմբիշը մրցեց Բուլղարիան ներկայացնող Հայկ Մնացականյանի հետ, որը ձեռքի վնասվածքի պատճառով չկարողացավ շարունակել գոտեմարտը: Հաղթանակը շնորհվեց Կարապետ Չալյանին:
«Գոհ չեմ իմ արդյունքից: Կարող էի դուրս գալ եզրափակիչ եւ պայքարել ոսկե մեդալի համար: Չգիտեմ՝ ինչը չբավարարեց կիսաեզրափակիչում եւ պարտվեցի: Գոհ եմ մեկնարկային գոտեմարտերիցս. հաղթեցի 2017 թվականի աշխարհի չեմպիոն Վիկտոր Նեմեշին:
Կիսաեզրափակիչում ադրբեջանցու հետ գոտեմարտում իմ սխալի պատճառով պարտվեցի: Մրցավարական կողմնապահություն չկար: Սխալ մարտավարությամբ գոտեմարտեցի: Ինձ լավ էի զգում մրցագորգում: Շատ լավ մարզավիճակում էի: Մեր մարզիչները շատ լավ էին պատրաստել ինձ Եվրոպայի առաջնությանը ինչպես ֆիզիկապես, այնպես էլ հոգեպես: Բրոնզե մեդալի համար գոտեմարտում մրցակիցս՝ Հայկ Մնացականյանը լուրջ վնասվածք ստացավ:
Մրցումներից հետո խոսեցի նրա հետ, ասաց, որ դեռ պետք է բժիշկները զննեն, նկարեն, որպեսզի պարզ լինի, թե ինչ աստիճանի է վնասվածքը, բայց կարծում եմ՝ լուրջ էր: Հայկն այն ըմբիշներից չի, որ թեթեւ վնասվածքի պատճառով չշարունակեր գոտեմարտը»,- ասաց Կարապետ Չալյանը:
Չալյանը պայքարը սկսել էր որակավորման փուլից, որտեղ 11:2 հաշվով հաղթել էր Շվեյցարիայի ներկայացուցիչ Նիկոլաս Կրիստենին, 1/8 եզրափակիչում 3։1 հաշվով առավելության էր հասել աշխարհի չեմպիոն, սերբ Վիկտոր Նեմեշի նկատմամբ, քառորդ եզրափակիչում էլ 5:2 հաշվով հաղթել էր բելառուս Պավել Լիախին: Կիսաեզրափակիչում 0:3 հաշվով պարտվել էր ադրբեջանցի Սանան Սուլեյմանովին: Չալյանը բրոնզե մեդալակիր էր դարձել նաեւ 2016 թվականի Եվրոպայի առաջնությունում: Նշենք, որ Կարապետ Չալյանը Նուրսուլթանում տեղի ունեցած աշխարհի առաջնությունում նվաճել է Տոկիո-2020 Օլիմպիական խաղերի ուղեգիր:
Լուսինե Շահբազյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.