Հայկ Իշխանյանը՝ «Ժետիսու» տեղափոխվելու, Կամո Հովհաննիսյանի խորհուրդների եւ առաջին արտասահմանյան փորձի մասին (ֆոտո)

09:09   7 փետրվարի, 2020

Ֆուտբոլի Հայաստանի ազգային հավաքականի պաշտպան Հայկ Իշխանյանը մի քանի օր առաջ Երեւանի «Ալաշկերտից» տեղափոխվեց ղազախական «Ժետիսու»։

NEWS.am Sport-ի թղթակցի հետ զրույցում 30-ամյա ֆուտբոլիստը պատմել է իր տեղափոխության, նոր մարտահրավերի եւ հավաքականում թիմակից Կամո Հովհաննիսյանի խորհուրդների մասին։ Հովհաննիսյանն այս ձմռանը «Ժետիսուից» տեղափոխվել է «Կայրաթ»։

«Մի քանի առաջարկներ ունեցա ղազախական ակումբներից, բայց ընտրեցի «Ժետիսուն»։ Մեկշաբաթյա հաջող փորձաշրջան անցա եւ «Ղարաբաղի» դեմ ստուգողական հանդիպումից հետո պայմանագիր կնքեցի։

«Ժետիսուի» առաջարկն ընդունելուց առաջ խորհրդակցեցի Կամո Հովհաննիսյանի հետ, որն անցած մրցաշրջանն անցկացրեց այս ակումբում։ Կամոն պատմեց ակումբի, ֆուտբոլիստների, թիմի խաղային ոճի մասին։ Նրա խորհուրդներն ինձ շատ օգնեցին։

Տեղափոխությունս «Ժետիսու» համարում եմ քայլ առաջ իմ կարիերայում, քանի որ Ղազախստանի առաջնությունն իր մակարդակով գերազանցում է մեր առաջնությունը։

Սա իմ առաջին արտասահմանյան ակումբն է, ցանկանում էի փոխել առաջնությունն ու մթնոլորտը։ Այլ առաջնությունում ուժերս փորձելու ցանկություն կար, եւ ես օգտվեցի այս հնարավորությունից»,- պատմեց Հայկ Իշխանյանը։

Սամվել Սուքիասյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։