Ռուստամ Ալավերդյան․ Տիգրան Չոբանյանը ֆեդերացիան ղեկավարել է կանոնադրության կոպիտ խախտումներով

Տիգրան Չոբանյանը ֆեդերացիան ղեկավարել է ներքին կանոնադրության կոպիտ խախտումներով: Արտահերթ ժողովի կազմակերպումն ուղղակի անհրաժեշտություն էր:

Այս մասին լրագրողների հետ զրույցում ասաց Հայաստանի ավանդական ուշուի ֆեդերացիայի նորընտիր նախագահ Ռուստամ Ալավերդյանը, որը հունվարի 26-ին ֆեդերացիայի գործկոմի արտահերթ ընդհանուր ժողովում միաձայն ընտրվեց ֆեդերացիայի նախագահ:

Ֆեդերացիան 1992 թվականից գլխավորում էր Տիգրան Չոբանյանը, որը ներկայացավ ժողովին, բայց չմասնակցեց՝ համարելով այն ոչ օրինական:

Ռուստամ Ալավերդյանը ընտրվելուց հետո պատասխանեց լրագրողների հարցերին:

«Ցավում եմ Տիգրան Չոբանյանի նման արձագանքի համար, բայց սպասելի էր: Ֆեդերացիայում կայացավ մի բան, ինչ 26 տարի տեղի չէր ունեցել՝ լեգիտիմ ժողով եւ ընտրություններ: Հայաստանում կա ավանդական ուշուի 18 մարզադահլիճ, որից այս ժողովին բացակայեց 3-ը: Դա նշանակում է, որ մեր հրավիրած ժողովը օրինական էր: Երկար ուսումնասիրություններից հետո հասկացանք, որ Տիգրան Չոբանյանը ներքին կանոնադրության սարսափելի խախտումներով է ղեկավարում ֆեդերացիան: Շատ կուզեի, որ նա այստեղ լիներ. շատ հարցեր ունեի նրան:

Ֆեդերացիայի նախագահի ընտրություն նախորդ անգամ տեղի էր ունեցել 2014 թվականին: 2018 թվականին պետք է ավարտվեր Տիգրան Չոբանյանի լիազորությունները: Բայց մինչեւ այս Չոբանյանը նշում էր, որ իր լիազորություններն ավարտվում է 2020 թվականի ապրիլին: Մեզանից որեւէ մեկը չէր էլ հետաքրքրվել՝ ժամկետները ճիշտ են, թե ոչ, քանի որ բոլորս էլ վստահում էինք նրան: Նախորդ տարվա դեկտեմբերին մի շարք ուսումնասիրությունների արդյունքում պարզեցինք Տիգրան Չոբանյանի բազմաթիվ խախտումերի մասին: Գործկոմի անդամների 1/3-րդի նախաձեռնությամբ շատ շտապ կազմակերպեց արտահերթ ժողով»,- ասաց Ռուստամ Ալավերդյանը:

NEWS.am Sport-ի հարցին, թե ինչու է որոշել հենց իր թեկնածությունը առաջադրել ֆեդերացիայի նախագահի պաշտոնում, նորընտիր նախագահի խոսքով Տիգրան Չոբանյանի հետ ղեկավարման վերաբերյալ տարբեր կարծիքներ ունենալուց եւ ֆեդերացիայում առկա լարված մթնոլորտից ելնելով:

«Պարոն Չոբանյանի հանդեպ ունեցել եմ մեծ հարգանք. նա եղել է իմ դասախոսը, շատ բան եմ սովորել նրանից, բայց եկավ ժամանակ՝ հասկացա, որ մեր տեսակետները շատ տարբեր են: Այսպես ստացվեց, թերությունները քաջ գիտակցելով հասկացա՝ կարող եմ ինքս ղեկավարել ֆեդերացիան: Եղել է կոլեկտիվի խնդրանքով: Իմ տեղեկություններով Չոբանյանի գլխավորությամբ 2017 թվականին ազգային հավաքականը հավաք է ունեցել Ջերմուկում, իսկ Գյումրիում կազմակերպվել եւ անցկացվել է մանկապատանեկան մրցաշար: Ջերմուկի հավաքի համար 1 միլիոն 760 հազար դրամի, իսկ Գյումրիի համար 1 միլիոն 698 հազար դրամի հաշվետվություն է ներկայացվել: Այս ժողովին ներկա մարզիչները փաստեցին, որ Ջերմուկում երբեք հավաքի չեն մասնակցել, Գյումրիում՝ մրցաշար չի անցկացվել: Ես այսօր դեռեւս միայն հետաքրքրվեցի ներկաներից, բայց դեռ չարաշահումների մասին հայտարարություն չեմ անում, մինչեւ լիարժեք չուսումնասիրվեն դրանք: Դրանից հետո նոր ամեն ինչ կքննարկվի իրավական դաշտում:

Ֆեդերացիայի հարաբերությունները շատ վատ են Եվրոպական ֆեդերացիայի հետ: Պարոն Չոբանյանը մեզ համոզեց, որ այս Եվրոպական ֆեդերացիան միջազգային ֆեդերացիայի կողմից ճանաչված չէ, անհրաժեշտություն կա դուրս գալու Եվրոպականից: Պարզվեց՝ այդ ամենը սուտ է, Եվրոպական ֆեդերացիան հանդիսանում է միջազգայինի հիմնադիր անդամ, իսկ երկրի օրինական ֆեդերացիան պարտավոր է լինել Եվրոպականի անդամ: Տիգրան Չոբանյանը մեզ համոզում էր, որ ինքը հրաժարական կտա այս տարվա ապրիլին, բայց մենք այլեւս չէինք կարող սպասել, քանի որ ապրիլին Եվրոպայի առաջնությունն է ու մինչ այդ պետք է կարգավորենք մեր հարաբերությունները Եվրոպական ֆեդերացիայի հետ»,- մանրամասնեց Ռուստամ Ալավերդյանը:

NEWS.am Sport-ի դիտարկմանը, թե ինչու 2018-ին չեն պահանջել ֆեդերացիայի նախագահի նոր ընտրություններ, եթե նախորդը 2014-ին է եղել եւ ինչու է հիմա նոր բարձրաձայնում ֆեդերացիայում առկա խնդիրների մասին, նորընտիր նախագահի խոսքով՝ 2018-ին չեն հիշել, որ նախագահի լիազորություններն ավարտվել են:

«Ես մասնակցել եմ 2014 թվականի ֆեդերացիայի նախագահի ընտրություններին: Ըստ կանոնադրության նախագահության ժամկետը լրանում էր 2018-ին: Ստացվում է, որ որեւէ մեկս չի հիշել, որ 2018-ին նախագահի լիազորություններն ավարտվել են եւ պետք է նորը անցկացնենք: Գիտեք, մարզիկները հիշողության հետ կապված խնդիր ունեն: Բայց լավ է ուշ, քան երբեք»,- ամփոփեց Ռուստամ Ալավերդյանը:

Լուսինե Շահբազյան